maogma ang harong
na pano ning kaakian
ga karawat, hurutaan
surugutan, huruyaan
iliwar…burukudan –
(sa pasuhay-suhay,
lalong minakusog si Iyay)
dangan gururuan na naman.
pag-uha ni ubô
paburukod sa kuwarto;
harangra sa tugang
sayaw-kanta si Nanay.
“uya si Tatay”
pailinutan pag amen
kaliribukan na naman!
(nawara ang ngaro ning ama)
sa pagkaon, gabos harampang;
cosidong atuloy
pritos na turay
ninatkan na kalunggay
maripating linimunan
tunay na pinasilam
ning simpleng kaogmahan
bago magkaturog
sa altar minaluhod
*salamat sa pagkamoot:
saimo, Dios, mabalos!