haen na su regalong paraiso
sa mga ginahang tawo
hari sa puso ning kaglalang?
haen na su urgullo
ning mga catandunganon:
islang mabansay, matoninong?
hain na su dating
amyo ning kakahuyan,
ning kaomahan
hayahay ning kadagatan?
haen na su mga bahay na gasarayaw,
mga sarog na masurog,
malinig na kasapaan?
IN MEMORIAM!
wara na….napara na?
ultimong kakahuyan,
ultimong uring……
ultimong pungko kukutkuton!
mga baybay hahakuton!
ah… pagkamasadile-
mga hunyangong poderoso
demonyong nakamaskarang tawo!
kuwartang ga-ararisngaw,
mga drugang naka-bua……
iput ning civilizasyon!
sabi daa, asenso…
asenso sa ano?
Pano na su tawo?
KUN DAI TUMANGON
noarin daw matungkâ
sa daing tunong na pagsibâ
kaining mga áruy na dustâ?
haros inubos na
ang yaman ning isla.
ngonian igwa na naman
ning mga bagong dúong:
piratang mga aruy!
kun dai ta tumangon:
miminahon, kukutkuton
sisibâon, susupsupon
ang tadâ tang kusog…
ang satong kapungkuhan
ang satong kapantayan
ang satong kasarugan
ang satong kadagatan
magiging lubúngan
kan natadang kapobrehan.
