Segun sa sarong gamaculog sa nangyayari sa mga kabukidan kan Isla Maogma, an dapat daang basolon sa diit-diit na pagkakalbo caini iyo mismo an DENR, an an oficina adyan sa San Isidro Village sa Virac.
Sarong ejemplo daa an nangyari duman sa pagputol nin mga kahoy sa barangay Salvacion sa Caramoran.
An nagpaputol palan caini iyo an cadsadiri nin daga na taga-Virac.
Nagkua siya nin Private Land Timber Permit (PLTP) sa PENRO para sa sampulong kahoy na puputolon.
Inaprovaran man daa an permit pakatapos magtao kan mga caipuhan na papeles, caibahan an sertipikasyon kan capitan del baryo pati na an bayad sa treinta y seis pesos na application fee saka mil dos cientos na inspection fee.
Naputol an sampulong poon nin kahoy y dae na nacontento ta siguro madari man sana magkua nin permit, nag-apply otro para sa sampulong poon.
Alagad paka-isyu kan permit, an mga sinugo daa kan permittee na mga paraputol, imbes na sampulo sana an patumbahon, ginibong sitentang poon.
Ini an masakit sa PENRO ta dae man gamangno kan saendang gibo.
Minsan walo sana an forest ranger sa bilog na isla, bako man gabos na aldaw iguang PLTP permittee na maputol ning kahoy.
Cotana igua lamang nin gabantay sa mga paraputol tanganing ciertong an pagputol duman sana sa lugar na pagsadiri kan permittee o caya limitado sana sa sampulo na naaprovaran.
Dapat ining mainvestigaran kan mga nanunungdan na consejo o sanggunian.
*****
Kung an Ombudsman target ngonian an mga congtractor na nanginabang sa mga proyecto sa DPWH, dapat na helingon man caini an mga oficiales nin local na gobyerno na iyo an gapatrabaho kan saenda man sanang mga Proyecto gamit an lisensiya nin lehitimong contratista.
Igua daa caini ngonian sa Isla Maogma, pero bahala na kamo maghula kung sisay sa mga naelegir kan 2025, he! he! he!
Dae pa dindi cabali an mga opisyal na an mga negociong nakapangaran sa iba, nangontrata man nin supply o proyecto sa saenda man sanang mga LGU.
Madari man sana daang maisihan, ta an mga tawo kan elegidong opisyal an ga-follow-up kan mga voucher, he! he! he!
Dae daa puedeng makalaog an mga bakong harani sa dapog. Ni dae ka ngani makakua nin papeles sa bidding ta rarasonan ka kan BAC na naka-advance an mga oficinang susuplayan kan materyales. Herac man kan mga negocianteng toltol na gusto man mabuhay an mga familia kan saendang mga empleyado…
*****
Sampulong aldaw na sana maisihan na kung macatocaw o dae an mga suspendidong miembros kan junta provincial, caiba na si Bise Gob Obet.
Segun sa mga huringhuding, nagvisita daa si gobernador sa Ombudsman para hapoton kung ano na an estado kan kasong isinang-at niya contra sa mga kalaban sa politica.
Duwa man sana an puedeng mangyari.
Kung masunod an gusto kan gobernador, dae na makavuelta sa puesto an mga sinipa niya sa puesto y posible pang dae na macacandidato o caya macalaog sa gobyerno.
Kung suspensyon sana an sentencia, macatocaw oraw mismo an mga nasuspinde y caipuhan man maglayas sa mga oficinang inocupar ninda an mga tundaon na bocal, he! he! he!
Kung mangyari ini, maribok na naman an Capitolyo.
Atang disturbado na an mga constituentes kan isyu sa coal mining, gold mining, pati na an pagmina sa caban kan gobyerno, mabubuhay na naman an ralaban kan mga nasa campo nin dati sana contra sa mga padagos sanang paanos, he! he! he!
Habang amay pa, magayon na igua nang magpataya sa resulta kan burulang na gigibohon kan Ombudsman sa Nov. 28…
