Nareparo kan mga educado an bakong tanos na Ingles kan saro sa duwang panandaliang bocal na bakong tahodan na politico o caya mga pasado sa board exam.
Tinatsaran an salang ispeling sa post, caya an magayon na mangyari caini, dae na mag-post ning Ingles, kundi Bicol o Tagalog. Daeng sala, daeng mauyam, he! he! he!
Kung papagcanigoon, tugotan si PBM Torcelino y PBM Alintana na ipresentar an saendang mga resolusyon o caya makipagdebate sa sesyon gamit an lengguaheng gusto ninda.
Bahala na an doctor na dae nakabolong, an parabilang nin imo, an paratukdo asin an mga veteranong politico na magsabot.
Bahala na man sinda magsimbag sa gusto nindang lengguahe. Kung Ingles, bahala na man si SP Secretary mag-translate tanganing masabotan man kan duwang ini.
Ang minutes gibohon sanang Ingles, basta an pakasurat tama man duman sa tinaram sa sesyon na naka-record.
Tibaad magreclamo si atorni na madodoble an saiyang trabaho, caya puede man siguro siyang magsingil nin dagdag na allowance sa duwang PBM na mapapaboran, he! he! he!
Para mientras dae pa ini nangyayari, magayon na si PBM Torcelino y PBM Alintana magpalaog nan in casual na empleyado, lalo na itong alisto mag-Ingles na daeng trabahong maestra, tanganing malinig y daeng sami an saendang ikahang sa social media asin itaram sa sesyon asin tribuna.
*****
Minsan na-dismiss na kan Ombudsman an kasong isinang-at ni atorni Puting Buhok qui Cong Yoloyo y dating Presidente Azanza.
Dae sana tabi paghilngon an “dismiss” kundi basahon an orden caini na an reclamo idara sa saendang mga imbestigador para marepaso.
Saro man sana an dahelan kung ngata dae pinaboran kan Ombudsman an parabuaaw sa Catanduanes Tonto: saro sanang papel an isinumitir na evidencia.
Talagang dae man maobra kung an patunay sana iyo an minutes kan miting nin consejo municipal manongod sa Home for the Elderly na binogtak duman sa kaharayong lugar sa puro kan CatSU sa rikod kan Tibang.
An caipuhan iyo ini: sertipikasyon kan building official sa Virac LGU na daeng building permit an edificio kan ini tinogdok; sertipikasyon hari sa Board of Regents na dae sinda nagtao nin basbas sa proyecto nin gobyerno, lalo na ta ini para sa mga goslab nin Virac; y sertipikasyon hari sa DPWH na mapatunay kung sisay an nagboot na duman ini ikahang sa kalipungawan nin CatSU.
Kung ini makua ni atorni Puting Buhok, siguradong maabante an kaso…
*****
Hinari na daa an caratulang “Proyekto nin gobyerno, Bako nin Politico” na pinahakang ni alcalde Posoy duman sa patinampo papunta sa palasyo ni Gob Azanza diyan sa San Isidro Village.
Bako man siguro sa kasusupgan o reparo kan publico, kundi tibaad sasalidahan man sana an slogan.
Gigibihon sigurong “Proyecto nin Gobyerno, Pakinabang nin Politico,” he! he! he!
*****
Dae daang tirin-ohan duman sa graduation nin CatSU an duwang lider nin Isla Maogma.
Magkanataning man cotana sa tocawan si Cong Yoloyo y Gob Pata, alagad imbes na paripason an oras sa istorya, abara daa an duwa sa pagmaan sa selpon, he! he! he!
Pareho man cotana an partido caini sa politica y dating nagcaibahan sa campanya pero maripot pa sa gacodot na sabaw nin paksiw na carneng baka an relasyon can duwa.
Inda kung caibahan ninda an saendang mga agom sa okasyon.
Pero kung aduman man daa an mga ini, tibaad dae man maghoron-horon o magbeso-beso si Snow White asin si Lady Gaga, he! he! he!