Dae pa ngani nacatucaw nin toltol an anom na bininditahan na katukal kan mga suspendidong Lakas na PBM, igua daang nagluwas na listahan hari sa kahuruhalangkawi.
An listahan daang ini manongod sa mga importanteng comitiva na kakapotan kan sarong luma y siyam na bag-ong tukaw na mga bocal.
Dae ta isi kung nasunod an listahan na ini kan magsesyon an junta provincial kan Lunes, ta dae man ako tinawan nin copya.
*****
Segun sa mga nag-attender kan sesyon, iyo na daa ini an binaranga na mga comitiva base sa botohan o pirilian na nangyari.
An mga poderosong comitiva sa Appropriations, Finance and Budget pati na an Infrastructure aduman daa nakapunta qui PBM Albaniel. Poderoso ini ta adyan an budget pati na an mga proyecto na ipanaltag sa mga contratistang karatista.
Tolo an soboot kinua ni PBM Oyong Angeles: an Justice and Human Rights, Rules, Ethics and Privileges,asin an Ways and Means. Bagay ini saiyo ta dati na ining bocal, naging alcalde asin capitan del baryo.
Tolo man daa an nakadalagan sa agom ni atorni Tam-Tam: an Tourism, Education, Research and Development, pati na an Cooperatives and Livelihood. Pabor ini sa gaambisyon magin alcalde sa Caramoran, lalo na ta dati ining titser y an sa tourism caipuhan an presencia sa mga festival.
Aduman daa qui dating CatSU VP Dianela an Committee on Health asin an Committee on Women, Family, Disabled, and Elderly. Doctor man ini, pero sa libro, y bagay man saiya an icaduwang comitiva dahil sa pagiging babayi, maki-familia, maculog na an tuhod, y abantido na an edad, he! he! he!
Para qui PBM Sanchez, saro sana: an Committee on Trade, Commerce and Industry. Nagpahunod siguro si Madam ta mamasidan ngona an bag-ong trabaho, minsan igua cotana siyang consultant sa kusina kan capitolyo, an saiyang aquing abogado.
An STACAP TODA president na si PBM Alintana, natural kakapotan an Transportation and Communication, dinagdag pa an Public Safety and Peace and Order.
Bagay man qui PBM Torcelino an comitiva sa agriculture, ta siya abacalero, pati an public information, ta mapakinabangan an saiyang pagiging vlogger, he! he! he!
An mga natada sa mga ex-officio board members mga small-time na comitiva: Municipal Affairs y Environment and Natural Resources qui PBM Toto Mendoza, Energy asin Barangay Affairs qui PBM Honing Lumabi, y Youth and Sports Development asin Land Use, Conversion, Zoning and Reclassification qui SK PBM Buendia.
Kung painano man matrabaho an mga bocal na ini, lalo na an mga dae ni anong katungdan sa politika o panggogobyerno, helingon ta na sana sa mga maabot na semana o bulan.
An hurit sana kan mga goslab nang mga politico sa mga bag-ohan n aini, halabaan an pasensiya, hararoman an bulsa y tais-taison an utak tanganing preparado sa debate, iguang presupuesto sa mga solocit, y masigurong iguang laog an maluwas sa kimot.
*****
Kung aatid-atidon, kulang pa nin duwang miembro an SP ta dae pang pig-designate na kasalida qui PBM Bolotoy y PBM Bani na parehong NPC an partido.
Igua nang pinadarang nomination latter an NPC provincial chairman na si bise alcalde Kalem Surtida kan Virac alagad sagcod ngonian dae pang aksyon si Remulla manongod dindi.
An mga pignombraran sarong taga-Baras na tawo ni TGP Cong Bong y taga-Virac na dating alcalde.
An suspetsa kan mga tahodan sa politica, bako na naman na tunay na miembro kan partido an palaogon kan Capitolyo.
Igua na ngani daang osipon na an agom ni defunto PBM Sonny Francisco, na naotsan dahil sa kaiisip kan pagkasuspinde, tinangroan na maging kasalida kan saiyang esposo, minsan ini bako man miembro kan NPC kundi kan Lakas.
Sisay pa daw an gigibohan naman nin papeles na mga bag-ong ponpon na magiging tawo-tawo sa posporo kan mga poderoso sa Capitolyo?
Dae man pano puedeng daeng karelyebo an mga sinusindeng PBM kan NPC ta puedeng kasohan an DILG kan mga tunay na opisyal kan NPC.
Helingon ta sa masunod na mga aldaw an mangyayari…