Kung sisay man na taga-Isla Maogma an magana sa lotto ngonian na semana, igua kamong puedeng gastusan kan cuartang dae pinagalan.
Sa 6/58, an premyo gaabot nang cuatro cientos noventa milyones pesos. Sa 6/55, tres cientos cuarenta y uno milyones y an sa 6/49, ochenta y ocho milyones pesos.
Dae na mag-interes an magana sa 6/42 y 6/45 ta caipuhan niyo pang mangutang para makabayad.
Ini an saendang puedeng bakalon: an dating White House nin familia Alberto na ngonian pigadispatsa na daa sa halagang cincuenta milyones pesos.
Segun sa mga nacaisi, igua naman daang nag-interes sa mahigit cincuenta años na edificio na pirang decada nang napabayaan kan cagsadiri.
Caya kung kamo nanggana sa 6/58, 6/55 o 6/49, igua pa man nin uli an saendang ginanahan, puede pa magsabwag nin mananggatos sa terraza ni defunto Cong. Jose U. Alberto y defunto Gob. Salie Estacio, siring sa gibo ninda kan panahon, he! he! he!
An caipuhan sanang ciertohon, kung puede pang ocuparon an edificio sa camogtacan caini, kung puede sanang mahingayad o caipuhan nang gabaon.
*****
Saro man daang edificio sa Rizal Avenue sa Virac an pigapabakal sa ngonian dahil sa sakit nin negocio dara kan LCC.
Inda kung gurano man an hagad na presyo sa pirang escalon na tindahan, pero siguradong milyones man ini y an mga politicong mahabon, contratistang madaya o negocianteng hararom an bulsa an puede caini magbakal.
*****
Caya palan daa nag-abot an mga personajes kan Ombudsman sa Isla Maogma kan nacaaguing semana para investigaran an magcapirang proyecto ni Cong Yoloyo sa Gigmoto, Baras, Bato y San Andres.
Ini daa compuesto kan P55 milyones na access road sa Minaabat beach duman sa Sicmil, an flood control projects sa Tilod y Buenavista sa Baras, an seawall na kataning kan Batalay House of Representatives, y an saro pang proyecto sa Palawig.
An kaso sa access road pendiente ngonian sa Ombudsman y iyo ini an posibleng makaonong sa duwang inakusar – an dating amo sa DPWH regional office y an presidente kan ERR Construction Corporation.
An iba daang proyecto, sabi kan nacaisi, bagui daang toltol man alagad dae pigklaro kung kinutkot an fundacion para maheling kung talagang seis metros an laba kan sheet pile o tibaad binanga sana para dacula an ganancia.
An hapot kan mga naosipan kan bagay na ini, ngata ta mga proyecto sana kan gatocaw na congresista nin Isla Maogma, lalo na ta igua pang sarong gatocaw na congresista.
An simbag iyo ini: hinagad daa ini qui Ombudsman Remulla kan kahuruhalangkawing opisyal sa capitolyo.
Kung totoo ini, posibleng preparasyon na ini sa 2028 na derby nin mga mardos na iba-iba an timbang y pusta, matira an matibay, he! he! he!
*****
Dacul an naghapot kung ngata ausente an bumbero nin Caramoran kan magkasulo sa harong y tindahan ni Mayora Glenda kan Sabadong banggui.
An mga firetruck na nagresponde tanganing dae maglakop an calayo sa kataning na gasolinahan iyo an mga bumbero hari pa sa Pandan y Calolbon.
An firetruck palan daa kan Caramoran fire station aduman sa ciudad nin Legazpi pigapahingayad.
An hapot: ngata ta duman pa dinara na igua man sanang mga mekaniko sa Isla Maogma?
Kapagbootan daa pano kan dae mabot-an na tawong harani sa dapog.
Iyo daa ini an huringhuding, lalo na ta sa mga transaksyon daang macantidad, doble o triple an presyo caini kumpara sa tunay na singil.
Dae ta isi, pero mas magayon na mainvestigaran man kan COA o kan consejo municipal….