Dae pa sana naawat, iguang nag-abot na portable desalination machine sa Coast Guard diyan sa Virac.
Lalaogan sana ini nin tubig hari sa dagat y pakatapos maluwas ini na puede nang inumon, dae nang asgad kapareho kang tubig ning VIWAD.
An problema daa ta sagcod ngonian dae pa ini nagagamit. Dae daa napaandar kan mga personajes nin PCG, he! he! he!
Inda ko sana kung iguang tawong pinadara sa kung saen para mag-training sa paggamit kan maquinang ini.
Caya ngani siguro dineliber n aini sa Virac, igua nang batid magpaandar kang maquinang ini. Ano daw ang nangyari?
*****
Didiit palan makalusot sa special session kan SP kasu nacaaguing semana an proponidong badyet nin provincia para sa 2027.
An pagcaisi kan mga bocal an hagad na sesyon para sana sa pag-aprobar kan Amendad Annual Investment Plan na nagkakahalaga nin P27 bilyon, an P18 milyon na Supplemental Budget No. 5 y an P16 milyon na Supplemental Budget No. 6.
Alagad sa pagluwas kan noticia, nakasunod na sa Amended AIP an proposed 2027 budget, bagay na kinuwestiyon da ani PBM Joselito Alberto.
Segun sa saiya, an proposed budget para sa masunod na taon dapat na marepaso nin marinas kan gabos na miembros kan junta provincial, mag-agui sa Committee on Appropriations y discutiron kan plenaryo caibahan an Local Finance Committee tanganing hilingon saro-saro an cada item na nakalista para sa mga programa y proyecto kan administrasyon.
Pareho man sana in ikan pinalusot na appointment nin halangkaw na opisyal sa capitolyo, na nakatocaw sana ta dae ginibo kan Committee on Justice an saendang responsibilidad na magsumitir nin committee report na madepensa sa saendang pag-oyon sa nanombraran na pitong vez sinayumahan kan nacaaguing komposisyon nin SP.
*****
Ngonian na igua nang oficina nin NBI sa Isla Maogma, dae na matios an satong kahimanwa sa pagviaje paibong para magpila sa oficina caini sa Legazpi asin maggastos nin cuarta para sana sa sarong pidasong clearance.
An saro man na disventaje caini para sa mga parakasala iyo na madari na maghagad nin imbestigasyon sa mga kasong criminal o caya mga kamarangmarangan sa gobyerno.
Idagdag pa dindi an anuman na sala na puedeng ibasol sa mga kalaban sa politica, lalo na ngonian na panahon na dukot sa mga halangkaw na opisyal nin Ombudsman an satong gobernador, he! he! he!
Noarin daw ipahanap an mga reclamong isinakat sa Ombudsman laban qui Cong Yoloyo? Tibaad harani na, lalo na ta sarong taon na sana, mapoon na an campanya, he! he! he!
*****
Tolong semana na sana, matapos na an anom na bulan na suspension ni Bise Gob Obet y onceng bocal.
Sa laog kan panahon na ini, pueder ser na magpaluwas na nin desisyon an Ombudsman sa kasong isinangat ni gobernador laban sa saenda.
Sabi ngani sa huringhuding, dapat bago pa magselebrar nin 81st Foundation Day pinaluwas an desisyon para macabali sa pataratara ning kahuruhalangkawing opisyal sa capitolyo, alagad igua daang nagpugol.
Kung sa burulang, llamado ang reclamador ta may koneksyon sa kristo, caya siete diez an laban, he! he! he!
*****
Matoninong an Defuntorum kan Noviembre uno.
Bastante an pagkaon na bitbit kan mga familia, daog pa ngani an piyesta sa iba.
Bawal na an pag-inom nin agua de pataranta alagad kung igua man nin dara, tibaad nasa cahangan na nin tubig, dae mahalata.
Alagad, nagreclamo an ibang motorista sa pagbago kan ruta palaog asin paluwas sa apat na sementeryo sa Virac.
Naghalawig daa an inagihan ninda, igua pang dalan na cadaclan double-parking an mga sasakyan