Sarong goslab ang nagreclamo manongod sa pila sa famosong siopao sa LCC sa Cathedral Shopping Center.
Segun sa reclamador, cotana magkahang man daa an FC Bakeshop nin linya para sa mga wrangler na kapareho niya para suro-salida sa pag-order nin tinapay, lalo na ang siopao na bagui man sanang komo-komo kadakula.
Nagpila pano daa si Pay habang igua pang siopao, alagad pangpito siya sa pila. Dae pa ngani siya nacaantos sa counter, inubos na kan mga nagcairinot an toasted siopao, he! he! he!
Tiam-tiam na cotana si Pay lalo na ta nahangop an silam kan bag-ong luto na siopao, alagad napurnada pa, saying an riwoy, he! he! he!
Ngonian, madari man sana an solusyunan kan manejamiento kan panaderia. Tama si Pay na iduwa an linya, minsam mapiot ta saday an lugar ninda.
An saro pang solusyon, arogon kan mga local na panaderia, lalo na an Jaja, an estilo kan pagluto nin toasted siopao na baguing komo-komo tanganing mabawasan an parabakal sa FC Bakeshop.
Puede man sigurong an veinte porciento kan cada sung-ag itagama sa mga gurang tanganing daeng ribok.
*****
Sala sa tiyempo an mga darakupan ngonian na gibo kan kapulisan.
Duman sa Maynilang kayganda, sinuspinde na an pagtiket sa mga nakahuba sa mga pampublicong lugar.
Ginibohan na nin mga isyu an orden kan DILG, lalo na ta an amo caini gaambisyon na magsalida qui PBBM.
Uya man sa Isla Maogma, dinarakop man kan mga tawohan ni PD Cereno an mga gatinda ning bote-boteng krudo y gasolina lalo na sa mga barangay na harayo sa gasolinahan.
Sala sa tiyempo an campanyang ini, lalo na ta halangkaw an presyo nin produktong petrolyo.
Bako sanang an mga familia kan mga dinarakop an mauyam sa kapulisan y sa soboot nag-orden na halangkaw na opisyal nin capitolyo, kundi an mga parroquiano caini lalo na an mga ordinaryong motorista y paralawod.
An hapot ngonian: saen dinara y tinago an mga evidenciang ginalon o dram na krudo y gasolina?
An cuerpo de policia bako man na gasolinahan y daeng pasilidad para sa evidenciang madari magkarabkatab.
Puede man kasuhan an PNP nin unsafe storage of petroleum products.
*****
Sa mga nakaabot sa EBMC, an cadaclan na nacasabot disturbado kung ngata an nalistang pangaranna cagsadiri nin pigapatogdoc na bag-ong edificio sa ospisal iyo daa si Patrick Alain T. Azanza, imbes na an govierno provincial nin Isla Maogma.
Sabi ninda, tibaad gapalakas an nagpaguibo kan tarpaulin,lalo na ta an fondong pigapatogdoc caini hari sa bolsa ni Juan dela Cruz y pag-iriba.
*****
Segun sa VIWAD, mamibi na daa an mga consumidor tanganing mag-uran nin golpi y mapanoan naman an mga salog na pigakuahan nin tubig.
Dae nda daa mawat, bagui na sanang til-is nin orig an mabulos sa mga gripo kan halos once mil na consumidor.
An iba pa caini, caipuhan na magmata nin alas doseng matanga para sana magpailig sa saendang mga balde, container, pitsel y planggana, lalo na sa SIV kung saen adyan an VIWAD.
Magayon caini isabay na an pangapodan nin uran sa pamibi kan simbahan para sa katoninongan kan enterong kinaban.
****
Dae pa palan natapos an drama sa Capitolyo manongod sa appointment kan duwang amo na sinayumahan kan SP.
Ta an pagtubod kan gobernador qualificado an duwang ini, sige sana daang appoint saenda hanggan siguro matapos an termino caini sa 2028.
Ini an tunay na hilingmayan, daog pa an hunot-hunotan sa budget, he! he!