Reparohon ta daw ngona an tolong agencia de gobyerno sa saendang pagservicio sa publico (cabale an macuapo ni Nestor).
Enoton ta an BIR, an numero unong kolektor nin cuarta sa mga empleyado asin negocio.
Segun sa mga reclamador, sala daa an palakaw kan BIR na dae na magpabakal nin Documentary Stamp an mga tesoreria municipal y provincial asin mga tindahan.
Dati na daang gapabakal an tesoreria sa capitolyo pati an mga nasa municipio kan doc stamps sa halagang treinta pesos cada saro y an mga ini pigatinda man sa mga piling sira-sira store nin treinta y cinco pesos, diit na ganancia man sana para dae ka na mangahang sa BIR.
Ngonian daa, binawal na kan BIR ta pagtinda sa LGU asin tindahan ta pigadudahan daa an mga taga-BIR na iyo an gakita sa mas mahal na pabakal sa tindahan.
Caya ngonian, kung mangaipo ka nin doc stamps na ikahang sa mga documentong legal, caipuhan mong mamasahe nin treinta pesos papunta sa San Isidro Village duman sa oficina kan Revenue District Office No. 69 para magbakal nin noventa pesos an halaga nin doc stamps, pagbalik sa harong bayad naman nin treinta pesos, suma total naggastos ka nin ciento cincuenta pesos para sa tolong stamp.
An cada saro an gastos mo cincuenta pesos, mas lalong mahal kaysa treinta pesos na pabakal sa BIR pati treinta y cinco sa tindahan caidto.
Sala talagang palakaw na cotana dapat ta pag-isipan kan mga halangkaw na opisyal sa BIR, na mapusta ako mas golpi an nakuang deligencia sa mga negocianteng gahagad nin tawad sa halangkaw na buwis.
*****
Saro pa an PENRO diyan man sa San Isidro Village, ta pirang taon nang pirming wara-wara an amo.
Awat na ining pigareclamo kan mga gatransaksyon nin daga o kahoy ta halos suro-semana dae sa oficina.
Pigaabot nin bulan an mga pirmahan ta maabot yata diyan Lunes na odto o hapon, malarga pakatapos nin duwang aldaw, baya an mga pirmahan lalo na itong mga permit na siya sana an puede magrosnos.
Ultimong permiso nin paghakot nin kahoy na ibaryo sa kaibong na barangay aabton nin duwa o tolong semana ta dapat matiempohan mo an calag caini sa oficina.
An irason sana daa kan secretario iyo na nasa field an amo, alagad aduman na palan sa ibong. Lo mismong nadangog daa ini kan ciudadano kan itugon kan amo sa secretario.
Saro man an DPWH, adyan man sa kahadean ni Kapitan Mike Bagadiong, an DE na disipulo kan Batalay House of Representatives pirmi man ausente. Maabot Lunes, mahari Martes o Miercoles, kung minsan ngani an mga pirmahan pigadara pa sa Legazpi regional office.
Ano daw kung igua man nin toltol na record nin attendance kaining mga taga ibong na amo sa saendang mga oficina? Cotana bawasan man an saendang mga RATA y an bayadan an mga aldaw na sinda uya sa Isla Maogma.
*****
Diyan man sa Virac, nakaabot na sa oficina ni alcalde Samuel an reparo kan magcapirang mga stall holder sa silaan asin carnehan sa saod na piga singil nin quinientos kan mga taga-Bureau of Fire Protection.
Dae man daa puedeng ripasan kan mga paratienda nin sila y carne an BFP ta caipuhan an sertipiko nin inspeksyon sa pag-aplay nin mayor’s permit.
Ngonian, an tama cotanang proceso, saro sanang inspeksyon an gigibohon kan mga bumbero ta saro man sana an edificio nin saod.
Sa mga stall na gagamit nin appliances posibleng singilon nin quinientos alagad an mga taga-silaan y carnehan dae na man ta baldosa man sana y sarong ilaw o saksakan an gamit ninda.
Naoraw siguro an mga taga-BFP na mabawasan an saendang koleksyon nin duro-dakula alagad sala man na padanayon an bakong tamang proseso.
*****
Iguang huringhuding na iguang mga candidatong nakaguda kan nacaaguing semana, dae pa ngani gapoon an campanya, he! he! he!
Segun sa mga chismosong mga politico, an saro daa an gusto bayadan siya nin cincuenta milyones pesos bago magsumitir nin CoC, alagad naghabo an mabayad. Nagbaba sa treinte y sais milyones pesos, dae man siempre, hanggan makaabot sa quince milyones pesos.
Kung an imo dinuhor talaga kan maiming candidato sa cotana karibal niya, dae pa kitang kumpirmasyon.
Saro man daang nagcandidato an nacarecibe man nin cinco milyones pesos, segun sa sarong kalaban.
Marinas na negocio talaga an politica, lalo na kung popular an mahagad nin bayad y an mabayad delicadong matingkal sa puesto, he! he! he!
Maheling na sana sa campanya o sa Mayo 2025 kung totoo an mga huringhuding na ini, he! he! he!