Gabasa man palan nin Biblia an amok an DPWH District Engineering Office diyan sa San Isidro Village.
Segun sa mga nag-atender nin miting nin mga contratista pati mga para-pakyaw nin contrata, nagsermon daa si Monsenyor, ay sala, District Engineer Simon Arias manongod sa tratamiento nin buwis sa modernong panahon.
Ini daa kinua sa tataramon sa Banal na Kasuratan, sa Libro ni Mateo, capitulo veinte dos, versiculo quince hanggan veinte dos.
Sabi duman kan Kagurangnan sa mga tawo ni Herodes, itao daa ki Cesar (bako si ex-congressman) an para ki Cesar (atang bako si ex-congressman!), asin sa Dios an para sa Dios.
Napangalas daa an mga Fariseo kan madangog ini asin nagharale.
Iyo man daa an reaksyon kan mga contratista kan madangog an sermon ni San, ay sala, DE Simon, kan ini magtaram sa saendang atubangan, “An ki Juan para ki Juan, an ki Pedro para ki Pedro…”
Dae man daang nanguros kan madangog an tataramon kan santo, ay sala na naman, pinakahalangkaw na ingeniero sa San Isidro alagad dae sinda nagharale ta tibaad idagdag sa listahan nin mga parakasala, he! he! he!
Kung bako ka daang contratistang nabuhay sa bahog nin congresista, dae mo makua an gustong sabihon kan disipulo nin profetang taga-Batalay.
Sabi kan mga nakaisi, tolo daa an gustong sabihon kan pananaramon na ini sa bulod nin San Isidro.
Enot, kung kisay tinao an contrata, ay sala, an tinapay palan, dae na dapat pag-interesan pa nin iba, lalo na mga parabuso o alagad ni Astrobal, he! he! he!
Icaduwa, kung sisay an naghanap kan fondo, ay sala, karahayan hari sa langit, sainya man ibayad an lagay, ay sala, buwis palan, he! he! he!
Ini daa an duwang tugon na pinariwanag kan disipulo na nagkua pa kan mensahe sa Mount Sanai diyan sa Batalay.
An problema daa ta dae man nagpataratara si San Simon sa icatolong tugon manongod sa deligencia, ay sala, buwis palan.
Ini daa an eksaktong tataramon na dae na dapat iboses nin nakasabot na disipulos: “An ki Juan, bakong ki Juan, kundi ki Pedro pa.”
Awat na daa ining gustong ipasunod kan mga disipulos sa DPWH ta an gustong mangyari kan saendang kagurangnan, an fondong hinanapan kan sisay man na congresista o senador na taga-luwas, sa kahadean man giraray nin Bato madalagan an buwis pati na parking fee, he! he! he!
Alagad igua man siyempreng mga Hudas Iscariote pag-abot sa pagtaltag, ay sala, bidding-bidding, kan mga mejoras nin langit.
Iyo ini an dahelan kung ngata nadiskaril an mga plano kan mga paralutong alisto, gaonog-onog pa sana an maluto, pigtabag na an caldero, he! he! he!
*****
Marinas palan an camogtacan kan mga estudyantes sa CatSU ngonian na semester.
Segun sa osipon, amay pa sana gapraktis na an mga ini, kasabay an saendang mga maestro y maestra lalo na an mga part-timer, para sa maabot na SCUAA.
Iyo da aini an naisipan kan administrasyon, tanganing igua man lamang nin pakinabang an kakulangan nin klasrum sa escuelahan.
Caya, sarong bulan na daang baratlay an cadaclan na afectadong clase para sana maghanap nin dadagusan na cuarto, he! he! he!
Sabi kan mga nacaisi, dae man nin nahaman na bag-ong edificio ta an mga naenot anas hinubon pa ni Presidente Mining.
Ni dae ngani daang binakal na office supplies y computers sa mga colegio ta an fondong para dindi ginamit sa pagbakal nin apat na bus. Dae man daa puedeng sayumahan an mga nag-enrol ta mga votante ini.
Tutal matapos naman an saendang pagtios, biyo-biyoon na an ehersisyo. Iguang premyo an magana: estaran sa Palnab y bulanan na visita nin parapoon, he! he! he!