Ngonian na nagsabay an Kaaldawan nin mga Puso sa Miercoles de Ceniza, dapat na guiromdomon an hurit nin simbahan sa mga Catolico na mag-ayuno y abstinencia.
Segun sa anuncio sa mga misa, ang ayuno an pagkaon nin sarong daculang meal y duwang saday na meals. Ini para sa mga bakong senior citizen o goslab.
Sa abstinencia, dae ngona makaon nin ano man na carne an gabos, cabale an mga gurang. Dae man sinabi kung luto na o hilaw pa.
Caya mga tugang kong mahilig sa pakiubayan kung Febrero catorce, sa motel man o kung saen na higad, dae tabi puede magkaon nin carne, pero puede dilamon o hapiyapon, he! he! he!
*****
Ta dae man gadacula an camposanto, gagabaon na sa Marso uno an mga piling nitso na nasa gilid kan lumang sementeryo.
Aduman daa an mga pangaran nin mga gadan na afectado. An mga pirming gasimba, posibleng nasiguro na kung aduman an pangaran kan saendang mga paryentes.
Pasensya an mga dae nacaisi, ta hanggan na sanang katapusan an estada kan saendang mga ginikanan sa mga nasabing nitso.
Maheling na sana ninda an dating estaran kan saendang mga tigbak aduman na sa icalimang escalon kan apartment.
Mayad kung sobra an cuarta kan mga ini, ta puedeng ibaryo an tol-ang sa Himlayan San Lorenzo o diyan sa cataning na lubongan nin mga iguang imo.
Duman puede kang mamili nin nakatindog na lapida sa payohan kan lulubngan o magpatindog nin mansion para sa tigbak na gakahalaga nin saro hanggan dos milyones pesos.
Pasensya an mga hababaw an bolsa.
Noarin daw magcacaigua nin horno nin mga gadan sa Isla Maogma?
Kung mangyari ini, dae ka na mamroblema kung magaba nin pantiyon an simbahan o caya magbakal nin mahal na lubongan.
Puede mo nang ikahang sa garapon an abo kan saimong mahal sa buhay na suminakat sa langit.
An importante, abisohan an gabos na kapamilya, kaiba an katabang, kung ano an laog kan garapon ta tibaad mapagkamalan na ashtray.
*****
Nadagos na man palan an Year-End Report sa CatSU, na cotana dapat nangyari sa katapusan kan taon 2023.
Calendaryo na palan nin Intsik an nakabitay sa gabos na oficina kan unibersidad, ta iyo an sinunod, he! he! he!
Sa mga mahilig magreparo nin mandiliit-diit, an pag-atras kan iskedyul nin Year-End Report bakong gustong sabihon pan-os na ini, kundi paanos sana man siring sa nakaugalian kan mga nacaaguing bulan, he! he! he!
Nakipustahan an sarong opisyal nin CatSU na sigurado daang dae cabali sa report an dae gaandar na solar micro-grid project na ginastosan nin cuarenta y cinco milyones pesos.
Segun sa parahinghing, dae na man daa puedeng pabuweltahon an mga contratista ta binayadan na an enterong contrata, kaiba an inaapod na retention money.
Substandard daa an mga maquinang Cummins ta tinipid kan mga kahoron na contractor.
Ito man daang mga solar panel, an supplier kamidbid nin sarong halangkaw na opisyal.
Dae pa ini kumpirmado, ta natahi pa an mga sihong kan mga invuelto.
Sa panahon ngonian, masakit daang magparapahiling nin ano man na senyal nin pagkadisgusto sa administrasyon ta tibaad ipakua ka sa oficina kan hade.
Segun sa magcapirang Marites, pigapaapod daa an mga tabilan tanganing makiapiran sa nanunungdan.
An mga job order man daa, lalo na itong kuwestiyonable an pagka-fiel cabali an esposo o esposa, pinaapod tanganing hagadan nin panuga na masuporta sa maabot na panahon. Kung manuga, makurit an boligrafo sa papel kan contrata, he! he! he!
An problema sana sa mga panugang ini, dae nang bisa oras na maghale na sa puesto an pinanugaan.
Bakong arog sa capitolyo na halos cierto na kung sisay an matucaw pakatapos nin eleksyon, dae man makapili an pinanugaan kung sisay an masalida sa saiya sa maabot na Noviembre.
Kung baga, hanggan Oktubre na sana an plaso kan pinirmahan na contrata sa job order, paglaog nin masunod na bulan, pan-os na, he! he! he!
Kung sabagay, walong bulan na man sanang tios-tios, he! he! he!
Aw ano na ini, kung bakong paanos, napan-os?