Sa tabang ni Sorsogon Governor Boboy Hamor, dacul na tawo sa isla an paogmahon ni Gob Boboy Cua y Mayor Sammy Laynes sa maabot na Pasalinggaya 2022 sa Deciembre nueve.
Segun sa osipon, cierto nang mapa-raffle si Gob Hamor nin veinte-cincong motorsiklo, veinte-cincong durabox, veinte-cincong TV sets, quinientos na electric fan y quinientos na rice cooker.
Dae pa cabali dindi an cuartang cabangang milyon na ipanartag man kan gobernador nin Sorsogon, na tibaad magdagdag pa nin papremyo kung ganahan siya pag magheling an katawohan na maabot se Dec. 9 sa Plaza Rizal sa Virac.
Madagdag man daa si Gob Boboy Cua nin quinientos mil pesos para sa raffle mantang si Mayor Sammy dae na madagdag ta siya na man an magastos sa pagcaon y pag-estar nin sanggatos na visita haring Sorsogon.
Kung pano italtag an mga tikets y kung sisay an tatawan, maghalat sana tabi nin anuncio ni alcalde Samuel.
An sigurado daa iyo ini: an makakua sana daa nin premyo itong mga mapunta sa Plaza Rizal y an mga absent magnganga sana sa harong.
*****
Awat na daang nareparo bako sana kan mga estudyante nin CatSU kundi pati nin mga motorista y paralamyerda an daeng camogtacan na pailaw kan DPWH diyan sa overpass y kahabaan kan tinampo sa tampad kan unibersidad.
Sa duwang overpass, igua nang mga ilaw na pundido y madorom na an pigaguihan kan mga estudyante.
Sa gilid man kan tinampo, sobra nang cabanga kan mga solar streetlights na kinahang pa kan kapanahonan ni Cong Hec an dae pa gailaw.
Hapoton ta lamang si DE Joven kung igua pang fondo para sa pagsalida kan mga depektibong mga ilaw na ini ta tibaad inubos niyo na man sa pagpasueldo kan mga job order na pinalaog ni Cong Yoloyo y an kapartner niyang congresista.
*****
Sagcod palan an Department of Labor and Employment (DOLE), sakop pa kan congressional district office.
Segun sa mga chismoso diyan sa may terminal nin RSL, bag-o na daa an mga pandok kan mga casual na trabahador diyan sa DOLE.
Pinalayas na daa an mga job order na awat nang nadestino diyan sa provincial office por sobre sa hinghing nin saro man na congresistang dae nagcandidato.
Bawas-dagdag palan an istilo ngonian, mabawas nin mga kakampi nin kalaban y magdagdag nin sadiling tawo, he! he! he! Dae madagdag an votante, alagad makinabang an mga loyalista…
*****
Inabot palan daa nin alas dos nin maaaga an pagpili sa mga nanggana sa Binibining Catanduanes 2022.
Halos cabangang aldaw nin turukaw an mga naghiling kan paso nin mga candidata y iyo man an ginibo kan mga nasa board of judges.
Dinaog daa an cotana pinakamagayon na daraga sa listahan, an candidata kan Baras, ta maluya daa magsimbag sa hapot.
Noarin daw talaga mapili an mga tawo nin pinakamagayon na babayi?
Sabi ngani nin sarong opisyal nin Butakal Association, parareho man sanang maitom an kilikili kan mga candidata, cotana ngaya sa pagarayonan sana an contest bakong pagbalihon pa an namatidan sa escuelahan.
Saro pa, tangani daang dae na maghalawig an pageant, sa pagpoon pa sana kan preliminary stage, hagayon na an mga maitom an iyok, iguang peklat sa bitis, dakula an pus-on, y saday na mga mansanas, tanganing anas magayon an matada.
Tapos, paeksaminon gabos sa written test an mga ini, tanganing mahari na an mga maluya magsimbag.
Saro pa, dae na pagpatarmon sa entablado an mga politico y mga visita ta lalong gahalawig an programa. Magkaway-kaway na sana sinda sa live coverage kan event tanganing daeng abara.
*****
Dae pa cierto kung iguang maabot na bagyo ngonian na semana, minsan sabi kan ibang weather website igua.
An marinas caini, magpasimbahan, magdasal, magpamibi sa mahal na Dios na an presenteng panahon na gataga-uran, gataga-init, magtener sagcod sa katapusan nin taon 2022…