Inaapodan an cadaclan na mga Catolico, lalo na itong mga parasimba, na magparticipar sa fun run sa maabot sa Sabado diyan sa Virac.
An makukuang ganancia sa registration fee sa daralagan y Zumba titiponon bilang tabang sa mga naghehelang na mga padi, retirado man o bako.
Natural mabali man sa fun run an mga kapadian, pero dai na puede su mga irido na y dae na makalakaw.
*****
Sabi ning sarong filosofong Catolico, an dapat daang basolon kung ngata dacul na mga padi an gahelang sa ngonian iyo man sana an mga Catolicong gapasunod kan kaugalian na an mga masilam na parte nin handa sa piyesta o anuman na funcion para sa padi.
Sukat pano ngayang an pinakamarinas na parte nin lechon itagama ki Padre, pati na an matabang humba, morcon, camaron rebosado, kinis, banagan asin iba pang mga maray na clase nin rinuto, he! he! he!
Tapos painumon pa nin mga mamahalon na mga alak o agua de pataranta, lalo na mga imported na long neck arog nin Blue Label, Chivas, Macallan, Jack Daniel’s asin iba pa.
Minsan ngani an gibo kan cagharong, dae tutugotan si padre na magparibod hanggan daw maboyong, pabaronan pa nin Sharon, he! he! he!
Caya panahon na siguro na an mga mabisitang mga padi, hapoton na ngona kung ano an mga bawal na pagcaon, o caya may darang listahan caini na tinao nin doctor.
Puede man sigurong bago pacaonon si padre, apodon ngona an BHW para madeterminaran an BP o caya magbitbit nin medical clearance hari sa saiyang doctor na puede na magpatabad nin habhab o igtok.
*****
Nagdeclarar na palan si Gob Azanza na dae na siyang interes magcandidato guiraray bilang gobernador.
Saro man sana an gustong sabihon caini: cierto na siyang mabuag bilang congresista laban qui Cong Yoloyo o kung sisay pa an pinangaturogan na magcaigua nin oficina sa Gatasang Pambansa.
Dae na daa siya natakot kung sabihan siya nin mga votante na dae sinda mavoto sa saiya, basta gigibohon niya an tama para sa tawo.
Natural, paralakpakan an mga kalaban ni gobernador, lalo na an mga mahilig sa dati sana, he! he! he!
An declarasyon kumpirmasyon sana kan direksyon ni Gob Pata sa 2028, caya mas lalong mainit an sintikan caini ni Cong Yoloyo asin an kanya-kanyang trolls sa social media.
An dapat hapot ngonian, sisay man daw an ibala ni gobernador sa kanyon nin Capitolyo pag-abot sa campanya? Negociante, abogado, o kaalyadong politico? Cierto daw ini na matumang qui Bos Te Cua, harimbawa man na tugotan pa ini kan Corte Suprema na magcandidato?