Gainvestigar na palan an Ombudsman sa mga reclamo contra sa mga dati y presenteng congresista na conectado sa mga contratistang nacacoa nin daraculang contrata sa gobyerno.
Alagad, tolo sana tawo an pigngaranan kan opisyal: si Tarlac Rep. Christy Angeles, na an agom cagsadiri nin Northern Builders na nacacoa nin mga flood control projects sa manlaenlaen na rehiyon sa termino kan congresista caidtong 2022 hasta 2024; an gobernador nin Surigao del Sur na si Johnny Pimentel na conectado sa sarong corporasyon na invuelto man sa mga proyecto kan si Pimentel congresista pa; y si dating Pampanga Cong. Aurelio Gonzales Jr. na invuelto man sa companya nin kapamilta na naghakot nin minilyon na proyecto sa DPWH.
Inda kung noarin man pangaranan si Cong Yoloyo kan Isla Maogma, na an poderosong esposa y an mga aqui iyo an cagsadiri kan E.R.R. Construction Corporation na tinawan man nin minilyon na flood control project sa Metro Manila sa primerong termino kan miembro nin Batalay House of Representatives.
Ipinagbabawal kan Seksyon 3.h kan Anti-Graft and Corrupt Practices, pati na kan Constitusyon sa mga opisyal nin gobyerno na makinabang sa arin man na negocio, contrata o transaksyon kung saen siya iguang interes.
*****
Dae na maawat ma-bargain sale na nin mga orig sa Pandan y Caramoran lalo na ta dacul na daa an hayop na basang na sanang gaturuwad.
Segun sa osipon, magcapira na daang mga orig an piglubong sa cahadaen ni alcalde Olog y minsan dae pa man nin resulta kung positibo sa ASF an mga hayop, ciertong ngonian pa sana, pogaburuno na an mga orig sa cataraning na baryo para dae masayang an pinambahog caini.
Kung burad an mga gabarantay sa animal quarantine checkpoint sa Caramoran o caya sige sana an palaog diyan nin orig hari sa CamSur, baad ngonian na semana igua na man nin maotsan diyan sa mga tangkal sa teritoryo ni Meyor Glenda.
Mantang dae pa man gadagdag an presyo nin carneng orig sa saod nin Virac, magbarakal na ngona an mga gamantenir nin hayblad.
Dae na an maawat halangkaw na an pabakal nin mga parabuno ta igua nang aviso na dinagdagan nan in veinte cinco pesos an pabakal nin live weight, ciento otsenta na ngonian.
*****
Pigapariwanag palan kan Corte si atorni Puting Buhok kung ngata dae siya mapadusahan nin indirect contempt of court dahil sa ngalabngalab caini contra sa juez na nagcapot kan election protest sa pagca-alcalde nin Bato.
Segun sa osipon, kan Martes dapat magsumitir nin simbag sa duwang orden ni Juez Irwin Peña.
Harimbawang mapatunayan ining nagkasala, an magiging padusa caini penalidad na dae malangkaw sa treinta mil pesos o caya pagkakulong na dae malampas sa anom na bulan, o parehong penalidad y kulong.
Suma total, sarong taon na maestar si atorni sa Virac District Jail kung saen puede siya magin consultant kan mga detenido, he! he! he!
Alagad puede pa siya mag-apelar sa Corte Suprema.
An bareta mapapreso na sana daa an abogado y an tugon pa dae daa paghatodan nin pagcaon ta siya ma-hunger strike, he! he! he!
*****
Awat na palan na nagkasuritan an mag-ibong na lado sa kasong cyberlibel sa Pandan na nabareta kan nacaaguing semana.
Ini minsan an masakit sa mga gareclamo sa corte, lalo na kung magkafamilia, magkaamigo o magkaalyado sa politica.
Can panahon, si nagkasohan si alcalde Ribong y gobernador Danding alagad pacatapos nin pirang bulan magkaalyado na.
Sayang an binayad sa abogado, riwoy na nagtaralsik sa pagtaboga y an kulog nin boot sa daghan.
Sabi ngani sa Bibliya, maghoron ngona y patawadon an nagkasala bago darahon sa juez…
*****
Gusto palan daa kan Capitolyo na investigaran kan SP an soboot pag-harass sa mge testigo duman sa P107-milyon na anomalya sa relief.
Sayang an sueldo nin mga PBM sa bagay na ini ta adyan man sana an pulis na iyo an capable mag-investigar. Gusto man siguro magpasikat an mga sinugo na narigot sa riog, he! he! he!