Naongahan palan daa ning juez si atorni Puting Buhok sa korte durante kan hearing manongod sa mosyon kan aqui ni Cong Yoloyo na siya patocawon na bilang alcalde.
Afuera daa pano sa mga pagdiscutir kan mga isyu sa recount kan mga voto sa Bato sa pagca-mayor, sinabihan pa kan abogado an juez na siya nagsumpa bilang miembro kan Partido Federal kan 2022 caibahan an provincial chairman na si Yoloyo.
Igua cotanang plano an dating piskal kan panahon na ito na magcandidatong alcalde nin Panganiban alagad dae man nadagos.
Segun sa mga presente kan Lunes duman sa korte, kasu udma o ngonian na Miercoles iluwas an desisyon ni juez kung patocawon na an prinsesa nin Batalay House of Representatives sa oficina ni Mayor Johnny.
An cierto caini, mga tugang, dae matatapos sa pagtocaw kan prinsesa an caribocan sa bilangan nin voto sa pagca-alcalde.
Macaabot pa ini sa COMELEC, tibaad hanggan pa sa Korte Suprema an isyu kung ngata tinugotan ni dating Juez Ritche Regala na bilangon an tolong rejected ballots na dae ngani inako kan Vote Counting Machines.
Bako man cotana si Juez Irwin Peña an nagdesisyon na bilangon ini alagad siya na an nag-asumir kan kasong election protest y siya an nagpaluwas kan desisyon caya siya an maatubang kan petisyon ni alcalde Johnny.
Saro pa, harimbawang patocawon nanggad an prinsesa sa municipio, siguradong bako sanang saro an alcalde nin Bato kundi tolo, he! he! he!
Batid na kamo kung sisay pa an duwang matuwang pagpadalagan kan municipio, he! he! he!
*****
Daeng ibang solusyon sa problema nin sitenta y unong estudyante nin Computer Engineering sa CatSU kundi akoon kan propesor an responsabilidad na bayadan an tig-veinte cinco mil na tinao para sa educational tour.
Dae daa nadagos an tour sa Cebu ta pinasa kan travel agency na orihinal na kahoron ni Sir sa saro pang travel agency.
Sa kadimalasan kan taga-CatSU, tinabag daa kan icaduwang agencia an cuartang halos sarong milyon y seis cientos mil.
Nagtugot man daa cotana an orihinal na kahuron na gastosan an tour kan mga estudyante alagad kinansela na ini kan CatSU matapos na ibawal kan CHED an mga tour por sobre sa krisis sa economiya.
An pakimaherak daa kan propesor sa Enero 2027 na bayadan gabos an mga estudyante alagad insistido an mga magurang na dapat itao na an cuarta lalo na ta inutangan man sana ini kan cadaclan.
Kung dae daa ini mangyari, posibleng idara na an reclamo sa NBI o CIDG para maimbestigaran.
*****
Segun sa mga nacaisi, an totoo daang contratista kan natupag na riprap duman sa gilid ning pungko sa Puting Baybay saro daang prominenteng politico.
Ginamit man sana daa an contratistang taga-Naga sa bidding kan dos cientos otsenta milyones pesos na proyecto kan DPWH regional office.
Parte daa kan proyecto an maanomalyang pasemento kan national highway na sa ngonian iba man nganing companya an gapatrabaho.
Diyan sana sa pagbungkal kan cincuenta anyos na baldosa, dati nang iguang milagro ta an halo daa kan kongkreto bawas nin apat na semento sa cada cubico.
An pagpa-subcontract iyo ini: imbes na P280 million, cabanga sana o P140 million an makapunta sa subcontractor y an naenot na P140 million an maquinabang iyo an politico y an orihinal na contratista.
Caya dae magngalas kung ngata dae pa ngani duwang bulan, igua nang gabarakbak sa semento o mga batak sa baldosa an patrabahong ini.
Mayad nganing nabidyo ni Capitan Clavo an pagtupag kan riprap duman sa Calolbon. Puede pang manggana sa eleksyon si capitan, he! he! he!