Bag-o na palan an mga director kan Viga Water District na pinangengenotan sa ngonian ni Dir. Ma. Concepcion R. Aquino bilang chairperson.
An iba pang mga miembro na inaprobaran kan LWUA iyo sinda Gaspar Tutanes, Annaliza Tarraya, Gloria Ogena y Ma. Luisa Valenzuela.
Maguiromdoman na nag-orden an LWUA na sipaon an magcapirang miembros kan junta directiva matapos maisihan na bako man palan sindang qualificado sa posisyon por sobre ta dae sinda pignombraran kan magcacanigong sektor.
Kan enot, dae dinangog an LWUA mala ta an rason si alcalde daa an nagkahang sainda sa puesto.
Cadaclan pa daa kan mga dating director grabe an bantay sa mga transaksyon, pinakialaman ang manedyer na luminayas na sana sa kangorngogan.
Tibaad lamang sa bag-ong liderato, maisaayos na an suplay nin tubig sa Viga, lalo na an Natunungan Dam na sagcod ngonian dae nagagamit.
Sayang an sobrang sitenta milyones pesos na ginastos dindi kan DPWH kan 2020.
Cotana, pag-aratubangon sa miting ni alcalde Tuplano an mga invueltong mga opisyal sa water district, barangay Rizal, LWUA asin iba pa.
*****
Duman man daa sa Caramoran, sa kahadean ni alcalde Glenda, paapodon man daa kan consejo municipal an mga opisyales kan Caramoran Water Association (CARWASA).
Segun sa mga huringhuding, iimbestigahan daa kan consejo an bacong toltol na padalagan kan asosasyon, an dae pagcacaigua nin General Assembly pati na eleksyon kan BOD sa laog nin sampulong taon.
Ni dae ngani daa ining pinapaluwas na financial statements cada taon na magpapaheling sa mga consumidor caini kung an CARWASA buhay pa o gatinghak na.
Igua na nganing nag-osipon na harabo na magpasalida an mga opisyal caini ta diyan na nabubuhay sa beneficio o caya deligencia.
Dati na daa ining inavisohan na maging water district sa irarom kan LWUA, alagad nagsayuma daa an mga opisyal caini.
An pamibi daa kan mga taga-poblacion, ipadagos kan comitiva sa consejo an saendang pagreparo sa CARWASA tanganing magcaigua nin pagbabag-o sa manejamiento caini sa lalong madaring panahon.
*****
Halos sarong bulan na sana, mapoon na an campanya nin mga gaambisyon maging opisyal nin barangay.
Sa Septiembre daa maribot na an COMELEC para tabangan an mga gustong magcandidato sa cada municipio.
Caya an cada candidato magpoon-poon nang tin-o sa mga kanaratad, pangabrasa sa mga dae midbid y maglabay-labay sa mga harayong parte nin barangay.
An mga politico man, lalo na itong mga dae nasa puesto, magdulag-dulag na ngona ta masakit an panahon ngonian.
Dae sindang mga mapagkuahan nin panartag, afuera na sana sa mga dati nang maimo.
Halawig pa an paghalat, ta sa Deciembra pa man an borotohan.
Magluway-luway na ngona sa pagtao nin tabang, ta tibaad pag-abot kan pirilian, dae ka nang ikaduhor, he! he! he!
*****
Abonaran kan mga local na gobyerno an itaong wing van kan provincia.
Tama an rason ni atoni Puting Buhok na cotana ibang bagay o programa na sana an tinawan nin fondo.
Enot, kung an mga ini gagamiton sa paghakot nin relief goods sa mga barangay kung panahon nin calamidad o bagyo, bihira man tamaan nin limang bagyo sn Isla Maogma sa sarong taon,
Icaduwa, caipuhan magdagdag nin puestong drayber y mekanikong permanente an LGU tanganing masigurong mahalawig an buhay
Icatolo, dagdag fondo an caipuhan kan municipio para sa suweldo y beneficios kan mga ini.
Icaapat, dae man puedeng ipasobri an wing van sa mga ordinaryong tawo o grupo, ta bako man ining para sa pasahero y tibaad kasuhan pa an LGU kung ini madarusay sa bangin.
Icalima, kung iisipon nin mga tusong politico lalo na an mga mahilig sa kickback, dae makinabang an mga alcalde sa mga trak na ini kundi an mga opisyales sa capitolyo.
Siram sana ning iguang pigabaranga-banga…