Tawan ta ning espasyo an minasunod na pamibi para sa katapusan kan mga brownout, na kinopya sa orasyon na ginibo man kan mga consumidores nin Camarines Sur.
Gibohon ta ini sa enot na oras pagmata, minsan poypoy pa sa aningahot asin pagal sa nagdamrag na pamaypay.
Orasyon Para sa Pagbalik kan Kuryente
O, Dificelcong masuripoton
Kung sa pagputol makaskason
Hilnga kami ngonian madiklomon
Ika lang an samong paglaom
(Simbag) O Dificelco, magmadari ibalik an kuryente tabi…
O, Dificelco, minsan bill bakong totoo
Sarong bulan na kunsumo
an babayadan mi riboribo
herac man an daing sinsilyo
(Simbag) O Dificelco, magmadari ibalik an kuryente tabi…
O, Dificelco, mga direktor anas retirado
Sa EPSA 2 duwang vez nagvoto
Alagad an proceso palan palso
Sipaon paluwas dapat saindo
(Simbag) O Dificelco, magmadari ibalik an kuryente tabi…
O, Dificelco, contrata ki Hector tinao
Minsan daing masuplay nin krudo
Igua daang tangke sa Silangan
Alagad bobowa man sana palan
(Simbag) O Dificelco, magmadari ibalik an kuryente tabi……
O, Dificelco, nananarig kaming totoo
Magtabang mga epal na politico
Cadaclan daeng nahahaman
kundi puro sana kahambugan
(Simbag) O Dificelco, magmadari ibalik an kuryente tabi…
O, Dificelco, rikayan kami gabos
Sa aringahot na padagos
Dae na ngani kami nangarigos
Dahil sa tubig sige man an tios
(Simbag) O Dificelco, magmadari ibalik an kuryente tabi…
O, gabos na iguang kasal-an
Sa labi-labing pagtios ngonian
Kami nagngangayo-ngayo
Camo entero darhon sa enfierno.
(Otrohon niato) O Dificelco, magmadari ibalik an kuryente tabi…
Otobon ini sa laog nin quince dias asin oras mismo sa aldaw na an mapapara na an kadikloman sa Isla Maogma, he! he! he!
*****
Nangyari na palan an saro an saro sa kahagadan sa orasyon.
Sinuspinde na kan NEA an mga elegidong director kan Dificelco sa laog nin nobenta dias dahil sa nangyaring kasilibotan sa EPSA 2 y sa pagtao kan contrata qui Manoy Hector.
An suspension daa preventive man sana habang padagos an imbestigasyon. Adyan an posibilidad na sinda maabsuelto y adyan man an posibilidad na permanente na sindang harion sa puesto tanganing magcaigua nin special election.
Kung mangyari an saendang kinatatakutan, maogma an mga parapabakal nin voto pati na an gusto man magtocaw sa board room kan Marinawa, he! he! he!
*****
Bako man palan na pito an miembros kan junta directiva kan Dificelco.
Walo palan daa ini, segun sa mga chismoso.
An saro daa sa tolong bag-ong elegidong mga director, bitbit palan an saiyang agom sa cada miting kan BOD.
Dae man daa natarman na magluwas ngona lalo na ta sensitibo an hororon sa laog, ta masupog man daa qui director.
Ngonian ka, ta gasabay man ini sa paghabhab nin isnakan pati pangodtohan, an gabayad kan pagkaon kan mahal sa buhay ni director natural an mga miembros-consumidores, he! he! he!
*****
Saro pa, diyes mil paran daa an binayad kan limang director sa pagpaguibo nin simbag sa show cause order kan NEA.
An nagsingil kaibahan man sana nindang director na igua daang aqui na abogado, he! he! he!
Maheling an sa mga masunod na bulan kung epektibo an ginibong simbag kan atorning taga-Maynilang kayganda, he! he! he!
*****
Ay salamat sa mahal na Diyos ta pinanamit man nin macusog-cusog na uran an Isla Maogma.
Pati daa taringa ni manedyer Abuab nagpalakpak kan madangog an buros nin uran, simbag sa pamibi nin mga consumidores nin VIWAD.
Dapat mangapodan pa giraray si manedyer sa banwaan nin padagos na pagdasal para sa regalo nin Kagurangnan hari sa langit ta an binagsak kasu Lunes na banggi bagui sana an na hinuros na calson.
*****
Sisay pa daw an masuspindeng opisyal nin gobyerno sa Isla Maogma?
Igua pa daang masunod, base sa mga kasong sinakat kan mga nagdurolak na mga nawaran nin Pasensya sa saendang mga kaiwal.
Bakong sugot-sugot an nangyayaring ini, ta bako sanang kasusupgan an uminabot sa mga suspendido.
Anom na bulan na daeng sueldo y benepisyo si bise gob Obet y onceng pag-iriba sa junta provincial.
An mga director man nin Dificelco, tolong bulan na daeng miting. Entonces daeng bayad, dae pang libreng merienda y pangodto.
Caya inaapodan an mga parahagad nin tabang, dae ngona paghanapon an mga suspendido, maherac man camo….