Nanghinayang an ibang mga dae nacarecibe nin ayuda kung ngata dae daa pinadama kan consejo municipal an mga empleyado nin municipio na nagpalista sa Cash Relief Assistance para sa mga parakayod nin tricycle.
Segun sa saenda, cotana daa pinakubra na muna an mga barumbadong ini bago paapudon kaiba an mga naglista na nakinabang kan kabanga kan cinco mil pesos.
Ta kung ini daa an nangyari, posibleng sinipa na sinda sa trabaho, permanente man on bako, y puede pang kasohan nin estafa.
An pagcaisi ko, pinadara na daa sa personnel office an listahan kan mga soboot tricycle driver sa batch 1 y batch 2 para mahagay asin mamidbidan kung sisay duman an mga gasueldo na sa gobyerno municipal.
Helingon ta daw kung sisay an mga demonyadong ini pati na an mga alalay ni consejal Alip na iyo soboot an nagpalista.
*****
Sa katapos-taposi, dae man nin dapat basolon sa nangyari kundi an DSWD.
An reglamento sa pagtaltag nin ayuda iyo na an listahan nin mga recipiente isumitir kan LGU o MSDWO base sa saendang listahan.
Entonces, an aakoon sana dapat kan mga personajes ni Director Laurio iyo an listahan na hari sa MSWDO o sa oficina kan alcalde.
An problema iyo na an oficina nin gatocaw y gatindog na congresista sige man sanang sumitir kan saendang sadiring listahan na base sa nangyari pano nin milagro.
Mga benepisyaryong bako man na drayber nin tricycle kundi empleyado sa gobyerno, mga dorobeng lista asin iba pang iregularidad.
Kung sa ayuda sa mga parakayod, dati nang iguang makis-makis, inano pa daw sa mga nacaaguing ayuda sa AKAP, TUPAD y AICS?
Magayon caini, ibali sa imbestigasyon an mga listahan kan mga ayudang ini kung talagang mga nangangaipo an nakabali y daeng halong mga gadan, mayaman o aqui nin politico.
An suspetsa ko lugod, caya halangkaw an kudal sa Batalay, para dae makabuhi an mga buaya, he! he! he!
*****
Segun sa mga nagluwas na bareta, talagang dae man nacaisi an satong gobernadora kan miting na ginibo kan mga amo sa DOE, Napocor, NEA, Dificelco y iba pang agencia manongod sa cotana gigibohon na shutdown kan mga planta nin SUWECO kan nacaaguing semana.
Ini nangyari ta dae man pinadarhan si Azanza kan surat na ginibo kan manejamiento nin SUWECO.
Pacarecibe daa kan NEA y DOE an surat, dagos daa ining nagpaapod nin on-line miting sa mga nanunungdan para maresolveran an problema.
Murhi na naisihan kan gobernador an nangyari caya an ginibo niya, dagos na naglarga kinaagahan y nakimiting man sa amo kan DOE sabay papitik nin litrato para makahang sa social media, he! he! he!
Hapon na nin Martes, Abril 22, an aldaw ma maubos na an krudo nin SUWECO, dae pang noticia an Unioil sa Powerzon na magdeliber nak an 350,000 liters na krudo sa Marinawa.
Tibaad inabisuhan na naman ni Boss Te an depot sa Palnab ba itao na ngona sa SUWECO an krudo duman tanganing dae magbrownout sa isla.
*****
An saro palan sa dakul nang naaksidente diyan sa atrasado asin bagolbolon na patrabaho kan GCI Construction y RG Mercado Construction Services nawaran nin cuarta asin sarong badil.
Dae man sinabi kung pirang imo o anong claseng badil an invuelto, alagad naglayog daa palan an bag na nakanghan kan cuarta asin badil kan an motorista maglapun-og sa dalan.
Cierto kitang an aduman na mga usisero o caya gaaguing motorista iyo an nacaheling y nagkua kan bag na may imo asin badil.
Ipagpamibi ta na sana mga tugang an kaligtasan kan tawong ini pati an saiyang familia, ta masakit an balos nin yaman na bakong hari sa marinas na paagui.