Igua palan daang nag-abot na cien milyones na fondo sa Batalay District Engineering Office diyan sa San Isidro Village, Virac.
Ini daa hari sa Calamity Fund kan DPWH y para daa sa pagpahingayad kan mga imprastrakturang inuyah ni super typhoon Uwan kan nacaaguing taon.
Maguiromdoman na pagvisita ni Sec. Dizon sa Isla Maogma, sinabihan niya si DE Biaco na ipatrabaho na an mga nauyag ta dacul daa an fondo ning DPWH.
Hanem, ta ngonian pa sana nag-abot an cuarta, he! he! he!
Segun sa mga magatol an dila sa DPWH, namili na daa nin maorag contractor an congresistang gatocaw asin an congresistang gatindog
Natural, an numero unong qualificacion kan magana dapat iguang capital, lalo na itong ipamayad sa advance na SOP o pagpapalagayang loob sa mga amo, he! he! he!
An alisto magbotbot sa bolsa iyo an gana, he! he! he!
Ano daw palan kung an fondong ini naisihan kan gobernador, lalo ta nagsabi na daa ining igua man siyang parte sa mga proyecto nin DPWH?
*****
Saro na naman na motorista an naaksidente diyan sa patrabaho nin DPWH regional office na kinontrata nin GCI Construction.
Duwa man sana an rason kung ngata ini nangyayari sa patinampong ini nin taga-ibong.
Enot, imbes na bogtakan nin magcacanigong ilaw sa magcaibong na puro kan tinosang na baldosa, an ipailaw sana maromrom na solar light.
Icaduwa, an makabangga sana dindi kung bakong boyong, nangaturog sa manibela.
Magayon caini, sabi nin taga-DPWH, magtiripon na an mga tawong nagcarulugadan sa patinampong an tanganing makasuhan an contratista y DPWH Bicol.
Puede man na habang gaorolay camo, magpatinti nin cuatro cantos y guiraray pagparibod aguihan naman an padimalas na tinampo, he! he! he!
*****
Mayad pa an mga tricycle driver na iguang ayudang tig-cinco mil hari sa DSWD.
An mga gabarayad nin buwis, lalo na an mga empleyado sa gobyerno, mga empleyado sa privadong companya y mga negociante, awat nang nganga kung noarin man sinda macanamit kan ayudang an.
Lugi an mga parabayad nin buwis, lalo na an mga negocianteng halos taon-taon pigasingil nin BIR sa soboot mga pagviolar sa rekisitos.
Caya an mga gatrabaho sa gobyerno na dae pa man nin cuartang ipambakal nin electric bike o kotse, marinas na magtipon ngona nin pampagibo nin tricycle.
Puede man maghanap nin gapabakal nin prangkisa pati an unit. Ilipat ini sa saendang pangaran tapos magbali sa TODA minsan an ruta mo sana harong hanggan oficina, tanganing pag-abot nin ayuda, kabali ka, he! he! he!
*****
Bako man enterong sala nin manejamiento nin CatSU kung ngata kadigi an nakapasar na mga ingenuiero civil sa nacaaguing board exam.
Enot, apat na taon na sana an kurso sa engineering ngonian ta hinari na kan gobyerno nacional an cotana first year na pano nin basic math subjects.
Icaduwa, nauyag an pag-adal kan mga estudyante sa pasuro-suspinde nin klase dahil sa uran, init, y diit na hangin.
Dae man nin nanud-an an mga ini sa on-line class. Cadaclan ngani dae na gasurat kan leccion sa cuaderno. Pigapiktyuran sana an leksyon, alagad masakit nang hanapon pag-abot nin oras.
Base sa records kan PRC, an pinakahalangkaw na passing percentage nin CatSU sa CELE kan 2016 n 2017, parehong 78 percent.
Nagpoon ini magbaba kan 2022 (53%), kasabay man kan national passing percentage na 48% kan 2017 hanggan buminaba sa 36% kan 2021.
Ano daw an dapat gibohon caini?