Binisita na palan kan mga personajes kan DTI Catanduanes an familia kan babaying soboot nagadan dahil nacorriente nin depektibong radio na gibo sa Tsina.
Dae man daa sindang nin planong darhon sa Korte an isyu kundi makahagad sana lamang nin tabang sa companying nagbakal caini sa paagui kan Shopee.
Sagcod sa ngonian, dae pa man nin toltol na simbag sa familia an Cathand Online Shop na may oficina sa ciudad.
Alagad kung iisipon mo, dae man ini mapilitan na magtao kung sa saendang paghiling, bako nindang sala an grounded na radyo kundi ang naguibo caining companya duman sa Tsina.
Atang masakit nang probaran na talagang grounded an antenna kan radyo na parasa na ini matapos ipusak kan agom sa kauyaman.
Iyo ini an masakit sa namakal nin gamit sa Lazada, Shopee o Temu. Dae ka nin pagkakataon na testingon an nabakal mo, lalo na kung ini gagamit nin bateria o corriente.
An naheling mo sana sa selpon iyo an magayon na litrato kan saimong gustong bakalon y dae man nin mademonstrar na an eksaktong ideliber sa saimo tama y daeng diferencia, lalo na kung barato man sana.
Parareho an camogtacan na ini, mag mahal man o barato an saimong kursunada.
Igua ngani diyan na mga nagbakal nin veinte milon na selpon, alagad an laog kan kahon bato.
An magayon kaan, afuera sa pagbidyo kan pagbukas kan package na binakal online, an mga bagay na caipuhan isaksak sa corriente dapat ipatesting sa electronics shop tanganing makasiguro na an magamit dae mangiligkitig.
An talagang sigurado, diyan na sana magbakal sa Sunrise kan mga Taiwanese o duman sa Mr. DIY ta puede mong pilisipision, purbahan o patugtogon an saimong babakalon.
*****
Nabigla an gabos sa sentensya kan Sandiganbayan sa dating alcalde nin Virac sa naging papel caini sa PDAF scam duman sa Misamis Occidental.
Sitenta y tres hanggan ciento veinte siete anyos na pagkapreso, idagdag pa an babayadan sa gobyerno na P16.5 million na penalidad y an pagribod kan kaparehong cantidad na siboot tinabag kan Kabuhayan at Kalusugang Alay sa Masa Foundation, Inc. (KKAMFI), an NGO na an nakalistang presidente iyo si Flerida Antonio-Alberto, an agom ni dating alcalde Cito y ina ni PBM Jan Alberto.
An kaso kan gobyerno laban sa dating mayor nakasentro sa soboot saiyang pirma sa mga dokumento kan KKAMFI na ginamit sa pag-award kan mga maanomalyang proyecto ni congresista Marina Clarete.
Sabi kan Sandiganbayan Third Division, dae daa napariwanag kan dating alcalde kung ngata an mga pirma sa purchase orders kan KKAMFI bakong pareho sa saiyang mga pirma sa birth certificate kan saiyang aqui y sa saiyang marriage certificate, lalo na ta dae man siya nagpaeksamin caini sa NBI o ibang eksperto sa pag-analisar nin mga pirma o surat.
Kan Noviembre 2023, binasura pa sana kan Sandiganbayan First Division an mga kaso laban sa mga akusado sa PDAF scam duman sa Ilocos Sur, kaibahan si Flerida y an saiyang tugang na si Marilou Antonio Cucueco na sagcod sa ngonian dae nadadacop.
Sa paghiling kan Korte, bako daang pareho an pirma na nasa PO y sa mga lehitimong dokumento na isinumitir kan dating alcalde bilang evidencia, caya siya inabsuwelto.
Halawig pa an proseso y hanggan dae nakaabot sa Korte Supreme an kaso, dae man ini makulong y lalong bako man bawal sa saiya magcandidato sa masunod na taon.
*****
Duwang bulan y tolong semana na sana bago magdesisyon an mga makandidato sa 2025.
Igua na ngani daang namaaram na y an sarong elegido sige na ngani an punta sa mga funcion minsan dae imbitado, pahiribogan na nin pandok, he! he! he!