Ang pantaw ni Nang Anday
Tilipunan ning barangay.
Tiklad sana ang atop,
Kawayan ang salog, daing lanob
Kaya pirming mahayahay.
Kung bangging pakadlum
Manga kanatad duman tilipun
Pan-u dai makakawat ta madulum
(Dai pang elektrisidad kaidto).
Aki, gurang, larake, babaye –
Paburuag duman: pailinutan,
Surusuan, ilistoryahan,
Tarakutan, kilitikan…
H-a-r-a-h-a-a-n !!!
Wara na su pantaw ngonian.
Ang aduman na concretong tindahan –
Bintanang rehas, seradong puertahan,
Madulum ang laog, grabing aringahut.
Memoria kang pantaw
Magayon balik-balikan.
Ripotok na haraha
Haen na ngonian!