Nadismis na an mga kaso ni dating alcalde Flerida Alberto sa Sandiganbayan manongod sa soboot anomaliya sa paggamit nin PDAF ni La Union Cong. Thomas Dumpit Jr. na pinaagui sa duwang NGO.
An saro sa NGO, an Kabuhayan at Kalusugang Alay sa Masa Foundation, Inc. (KKAMFI) segun sa prosekusyon pinangenotan ni Alberto bilang presidente.
Sa desisyon na ilinuwas kan Sandiganbayan kan nacaaguing semana, bako daang pareho an pirma ni Flerida sa mga documentong isinumitir bilang evidencia kumpara sa mga tunay na pirma kan dating alcalde.
Caya daa mas naniwara an korte sa sabi kan dating mayor na dae siya nagpirma sa mga dokumento y entonces daeng partisipasyon sa mga kasong graft, malversation of public funds and malversation through falsification.
Nabawasan na an kulog nin arimantak kan dating mayor….
*****
Nagpoon na an mga manlaenlaen na mga organisasyon na magselebrar kan Kapaskuhan, caya mag-amot-amot an mga politico, nacatocaw man o nacatindog, nin mga itataong asistencia o tabang pinansyal.
Dae man puedeng magdulag-dulag ngona ta tibaad markahan kang kuripot, dae na makaotro o caya makabali sa listahan nin iboboto sa 2025.
Iyo, harayo pa man an eleksyon, sa otro taon pa ngani an pagsumitir nin Certificate of Candidacy (CoC). Alagad halawig an memorya nin votante, tibaad dae makayang mabolong nin pantapal na sanribo sa angog ninda, he! he! he!
Dae na maaser an panuga na kuahon na sana an itatao duman sa oficina o caya sa harong, ta tibaad dae man sinabihan an tawo sa oficina o caya sarado an harong y dae ka makasakat sa halangkaw na kudal, he! he! he!
Kung ako sa mga politicong ini, matipon na ako nin mga bag-ong mananggatos, aquinientos o manangribo na pangduhor sa maabot na mga aldaw.
Magbitbit nin tigsarong bugkos cada aldaw, ikahang sa mga iba-ibang bolsa nin pantalon asin guoilomdomon kung arin na cuarta an nasa bolsa.
Harimbawa, an mananggatos nasa wala, an aquinientos nasa too y an manangribo nasa bag, tanganing dae malawgaw sa pag-gawgaw sa gasolocit, he! he! he!
Mamakal pa nin baratohon na ham, sliced man o su bilog, na puedeng ipang-raffle kan mga organisasyon na gahagad nin ikadagdag sa pag-ogma.
Magpasensya ta iyo an an tradisyon pag abot nin Deciembre.
Kung naoraw kamo magregalo, dae na kamo magkandidato sa otro…
*****
An mga bag-ong eligidong capitan del baryo, o maski pa itong mga nakabarik sa puesto, pinapatanidan na kan DILG lalo na kung saendang hinari an mga barangay health workers na dati nang gasirbe sa barangay.
Segun sa osipon, diyan daa sa Baras asin Pandan, dacul na an tinangkas na BHW por sobre ta mga kalaban sa politica o aduman nagsuporta sa naderotang candidato.
Posibleng igua man caining nangyari sa iba pang siyam na municipio, lalo na ta an eleksyon sa barangay personalan y an lugad kan politica hararom.
An magiging problema kan mga capitan na mainit an payo sa mga BHW iyo an Local Health Board.
Segun sa Joint Memorandum Circular kan DOH y DILG, an LHB an maimbestigar sa mg caribocan na invuelto an mga BHW, lalo na sa pagpadagos kan serviciong tinatao ninda sa mga constituentes.
An anuman daang dae pagsunod nin mga local na opisyal sa saendang responsabilidad sa irasom ning duwang ley na minaproteger sa BHW posibleng maging rason sa paglansar nin administrative sanctions sa mga nagbalga caini.
*****
Apat na aldaw na bakasyon nin kaogmahan an mga empleyado nin gobyerno sa Virac, magpoon sa Hueves hanggan Simba, dahil sa Kaaldawan nin Virac sa Dec. 7, holiday sa Inmaculada Concepcion sa Dec. 8, Pasalinggaya ni Gob Boboy Hamor sa Sabado, Dec. 9, asin an pagbukas kan Christmas Cheers 2023 sa Simba, Dec. 10.
Dae pagsayangon an mga aldaw na ini….