igwa sakong naghapot
ngaya, ano ang magkanigong i-ngaRan
kang famosong bulebard sa Virac
diretso ko sinimbag –
TRINZERA NI MARIA
gustong sabihon ning “trinzera”
proteksyon, panangga, sandigan
macusog na puerto ning kaligtasan
lalo na pag mina-bagyong macusog
caiba ang nakatakot na so’uy
Maria, simbolo ning Virac
ang mga ginaha ni santa Maria
ang satong mahal na patrona
kaya, TRINZERA NI MARIA
caitong panahon
pag mina abot ang bagyong maisog
kaming mga taga higad ning baybay
poon sa ilawod sagcod sa taytay
daing ibang duduragan kundi ang simbahan
ta caito, daing ibang panangga
sa macusog na mga lungso
mga dalacurang pandan
(kaya ngani ang apod sa baybayon
dyan sa punta ning taytay, “pandanan”
ta grabe ang darakurang kapandanan)
na piga anod man sana
ning macusog na dagat
naogma kami kang ang govierno
magpatugdok ning sea wall
na natambunan man sana ning baybay
kang magrampahog ang bagyong macusog
otro patrabaho ang obras publikas
na mas halangkaw duman sa enot
pero narapak naman pag bagyong macusog
kaya kang utrohon ang patrabaho
baco sanang sea wall ang ginibo
kundi suportado ning halakbang na tinampo
na igwang parteng pasyaran ang mga tawo
pilang bagyo na ang uminagi
tindog pa man siempre
ining pinasarig na trinzera
poon sa concepcion sagcod san vicente
nagturobo pati ang mga negosyo
na lalong nakapaugma sa mga tawo
sa mga bangging bulanon
maski na ngani pakadlom
tilipon ang mga viracnon
aki, gurang, lalo na daraga, soltero
sa mariwanag saka mahayahay na lugar
makaogmang pag isip-isipon
na baging nagsinagbuan
ang trabaho ning govierno saka simbahan
tanganing mataohan ning proteksyon
ang katedral na magayon
kaya
TRINZERA NI MARIA