Dae pa ngani nakaparibod an bangkay ni Consejal Robert Maullon sa Isla Maogma, magcapira na daang mga derotadong candidato asin iba pang ambisyoso an nagpaabot nin interes qui Gob Cua na sinda an pillion na magsirve kan natadang termino kan defuntong miembro nin consejo municipal.
Cabali daa dindi an tolong nadaog na candidato kan Nationalist People’s Coalition (NPC) na iyo an partido ni Don Robert.
Si Cesar Angeles na dating capitan iyo daa an enot na nagpresentar, masunod si Kap Anthony Arcilla kan Lakas-CMD y an presidente kan Liga ng mga Barangay na si Kap Juan Arador.
Awat na man ining dalagan si Angeles alagad dae pa nakaantos sa finish line mantang si Kap Arador matapos na an termino ngonian na taon pakatapos kan barangay and SK elections.
Segun qui atorni Dexter Francisco, kung sisay sana an nominado kan partido kan defuntong kagawad an puedeng ngaranan na kasalida niya.
An kaipuhan sana iyo an nominasyon y certificate of membership hari sa pinakahalangkaw na opisyal kan partido.
An chairman kan NPC sa Isla Maogma iyo si Gob Cua, na iyo man an ma-appoint kan matukaw sa vacanteng posisyon sa Sanggunian.
Sa anom na candidato nin NPC sa consejo nin Virac, tolo an nadaog: si Angeles, dating consejal Nel Asanza y an retiradong PEO foreman na si Bogs Talan.
Dacula an posibilidad na sa tolong ini magpili an gobernador alagad madepende man siguro sa rekomendasyon ni alcalde Samuel Laynes (PDP-Laban) y bise alcalde Arlynn Arcilla (NPC).
Sabi ngani ni atorni Dexter Francisco, puedeng magsalida an nadaog kan 2022 elections basta miembro kan partido.
Alagad dae puede an sisay man na mabaryo nin partido, lalo na pakatapos kan eleksyon.
Puede daa an nagin miembro kan NPC pakatapos kan eleksyon, basta an fecha sa sertipiko mga pirang bulan pa bago an nangyaring kadimalasan qui Consejal Maullon.
*****
Nagpoon na daang magralayas an mga casual na ingeniero sa DPWH Catanduanes District Engineering Office bago pa man magkaurubusan nin fondo.
Maguiromdoman na bilang pagsunod sa mando kan nacatindog na congresista, naghagad an dating DE na si Joven na harion sa Isla an dos bilyones na halaga nin proyecto y ibaryo ini sa regional office para daa mapabilis an bidding.
An problema ngonian, mahigit daang cabanga kan otsentang casual na ingeniero an haharion ta maubos na an fondo para sa saendang sueldo y beneficio. Dae nang proyecto caya dae na man nin fondo.
An iba ngani daa naghari na y nag-empleyo sa Kalahi-CIDSS tanganing mapasiguro na igua sindang hanapbuhay.
Harimbawang cincuenta na sana an mawaran nin trabaho dahil sa kagibohan kan gatindog na congresista y gatocaw na congressman, maabot sa cincuenta man na familia an mamuromuto laban sa duwang politicong ini hanggan sa Mayo 2025.
*****
Ngonian na Semana Santa, lalo na pagpoon sa aldaw nin Jueves Santo y Viernes Santo, magayon na an gabos cotana maghorop-horop kan buhay, kasakitan y kagadanan ni Kristo.
Alagad, sa mga banal-banalon sana ini nangyayari.
An cadaclan sa modernong panahon nakaisip sana maghagad nin tawad sa Kagurangnan kung iguang daculang pangangaipo o iguang namati lalo na kung an helang ikagadan.
Igua man daa nin mga pigalaog pa man nin Espiritu Santo, alagad kung nasa simbahan sana.
An mayoriya pagpasiram an hanap, lalo na ta bakasyon.
Imbes na rosaryo an bitbit sa pag-Visita Iglesia, selpon asin power bank an nasa kamot.
Naenot pa magpitik kan camera phone bago mangurus paglaog sa simbahan.
Dae pa tapos an prusisyon kan Santo Entierro, an hororon na an pagpunta sa beach resort kinaagahan.
Ngonian, dae man caipuhan na magbali sa prusisyon nin nakabitis o maglakaw nin nakaluhod.
An importante, an paglaog sa simbahan o pagbali sa prusisyon bakong okasyon para magpanari sa social media kung hain ka kundi an pagpamibi nin odok sa boot ta dae kita nacaisi kung noarin kita kukuahon sa daga pasiring sa purgatory, impiyerno o langit.
*****
Pirang vez sa satong buhay, gaisip kita kung ngata an satong mga paboriting mga kapamilya y amigo an naenot magadan, mantang an mga kuripot, maisog, mahabon, parainom, parapanambay, asin iba pa mga makasal-an iyo an nahubon sa kinab-an.
An iba an hona an gusto nin Dios maenot na kaibahan niya iyo an mga maboot, mga banal, mga matinubod-tubod. Bahala na man an mga pastidyo kung noarin sinda makaabot sa Paraiso (bakong sa San Miguel).
Alagad bako ini an rason, sabi kan Profeta Isaias (Is 57:1-2):
“Nagagadan an mga matanos na tawo, asin mayong nakakasabot o nagmamakulog. Alagad pagkagadan ninda mayo na nin kasakitan na makakadotdot sainda. Nakakakua nin katoninongan saka kapahingaloan sa kagadanan an mga namumuhay na matanos.”