Iguang diit na reparo sa nangyaring sarabay na launching kan Resbakuna Kids sa Virac.
Segun sa mga chismoso y chismosa, sinolohan daa kan DOH an pagpadalagan kan vaccination duman sa CatSU.
Dae man daa mabasol an DOH ta sainda itong programa y sinubrian man sana an lugar sa unibersidad. Saro pa, nagdagdag pa sana nin mga vaccinator an Catanduanes DOH kaya sobra na an personajes.
An pigagumodgumod kan iba, nangimbitar pa nin mga taga-ibang agencia na dae na man nin lugar para saenda. Kaya ngani turukaw-tukaw na sana an mga ini, painit-init nin lubot habang padagos sa pataratara an mga politico y sige man an pagtusok kan mga taga-DOH.
Atang kulang an pighandang pangodtohan kaya ngani an ibang bisita nangodto na sana sa harong.
Kund susunodon an ginibo sa CatSU y VTC Victor Hall, kaipuhan magdara nin mga kenkoy, vaccinator na naka-costume na Batman o Wonderwoman, lobo y mga panlagay na dolce tanganing makumbinsi an mga aki na magpabakuna.
Ta kulang man an mga kenkoy sa isla (dae tabi kabali an mga candidato), ano daw kung duman na sana sa boulevard nin Bato y diyan sa laog nin junta provincial gibohon an pagbakuna kan mga aki?
*****
Marinas man an ginibong Unity Walk and Peace Covenant Signing na pig-organizar kan Catanduanes PNP y Comelec.
Cadaclan na mga kandidato sa itaas nagparticipar, afuera sa dating congresista, an paratinda nin carne na si Balbas y sarong PBM na gustong magin bise gobernador.
Si Cong Hec an nalain sa gabos ta nakapustura, baging dae malakaw sa tinampo kundi mapaso sa baylehan, he! he! he!
Si dating alcalde Yoloyo man, gadistancia daa sa atorning puti an buhok.
Segun sa mga nakaabot sa plaza, cotana daa ginibong hapon an programa ta dakul an tawo.
Paglakaw daa ninda, dae man sindang naagihan na mga votante ta nanok pa an mga ini. Anas daang gadya an saendang nahiling sa tinampo kaya siguro dae na pinadagos sagcod sa Taytay an pagbatlay ta sayang an pagal. Harimbawang igua man nin magimata sa paradang daeng tugtog, mabukas man ini nin bintana pero manghihimuta ngona, kaya dae mahiling an mga candidato.
Saro pa, dae man nin matubod na an mga nanumpang ini sa Integrity Pledge dae mangako o matao nin pampaogma sa mga votante sa maabot na eleksyon.
Magpoon na madaog an defuntong Diosdado Tabilin sa pagka-consejal sa Virac, dae pang nangganang candidato na dae nanaltag nin perac.
Iyan an makamundong realidad sa Isla Maogma, magpoon na magsabwag nin cuarta an mga Alberto sa icaduwang escalon kan White House, pwe!
*****
Sagcod sa ngonian, dae pang karinawan an soboot ginibong paglaog nin dae namidbid na tawo sa SP kan nacaaguing semana.
Segun daa sa duwang watchman, saro daang lalaki an nanotaran nindang gatangkas kan nakatahob na plywood sa walang gate kan edificio.
Kung ngata dae ninda ini inatubang o kaya tinutukan nin plaslayt, dae nasabotan kan publico (kabali an mga macuapo ni Nestor). Nagtupas daa an duwa sa Virac fire station y nagpa-acuder.
Dae man daang ibang binuksan o nawara sa mga oficina kan mga ginagalangan na bocal y bise gobernador.
Kung ngata man ta dagos man ini inibareta sa social media na harassment na naman laban sa masusupgon na bise gobernadora, bahala na kamo mag-atid-atid…
Cotana, salidahan an duwang guardia civil na ini sa pagdulag sa puesto ninda.
Harimbawang madakop man an estrangherong naglaog sa SP, dapat ining akusaran nin kapatalan, sa pag-uyag niya sa harang na plywood mantang mayang man an enotan kan legislative building.
Dakula an posibilidad na igua pang mangyayaring mga insidenteng arog caini, lalo na sa panahon nin campanya poon sa Marso 25.