ISIP-ISIPON TA | qui Tang Tacio:

Bayad Bago Motorcade (BBM)

Igua na daang gapalista nin mga masuporta sa kandidatura ni Manny Pacquiao.

Maabot na siguro ang Pambansang Kamao para magpaagaw nin mga T-shirt y sangribo para man sa sangribong tawo.

Caya an mga dae man sanang gibo sa panahon kan saiyang pag-abot, magpalista na sa kun sisay na lider an kinua sa barangay. Tibaad kamo na an masuerteng mapili na mahangop kan magisip na imo ni Pacquiao.

Inda man daw kung tagboon man kan dating congresista an saiyang dating amigo, na pirmi siyang pigatawan nin tiket sa cada boksing ni Manny kan panahon duman sa Estados Unidos.

Maguiromdoman na nag-aparecer pa daa ini duman sa asembliya kan PDP-Laban Pimentel wing bago nagkandidato si Pacquiao sa PROMDI.

Nabigla daa an retiradong boksingero kan maisihan na an saiyang dating amigo, aduman na qui VP Leni.

Matagbo siyempre an mga local na candidato kan PROMDI, sinda alcalde Posoy y pag-iriba, afuera daa kanaro o duwang pasusuhayon na dae gasunod sa reglamento kan partido sa pangangampanya.

Dae pa ngani gapoon an campanya, ga-iriwal na…

*****

Halaba man an motorcade o parada nin kadinakol na motor y magcapirang awto y trak magpoon Calolbon hanggan Virac kan Domingo para qui Bongbong Marcos (BBM) y Sara Duterte.

Amot man siguro an paruros kan organizer ta kung tres cientos na paramotor an nagbali, sa sanribo cada maabot nang tres cientos mil an gastos.

Segun sa mga nacaisi, igua daang tinaltag na panggasolina y pang-isnak sa mga nagbali, siring sa mga nacaaguing motorcade sa ibang lugar kan nasyon.

Talagang macuarta pa an mga Marcos, minsan lampas nang tolong decada matapos palayason sa Malacanang an dictador.

An marinas na hapot, pira man daw sa mga paramotor y pasahero ninda an talagang mavoto sa BBM-Sara?

*****

Dismayado an publico sa pagcambio ni alcalde Posoy sa pagbaba kan pamasahe sa traysikel dahil sa Alert Level 2.

Maguiromdoman na pirang bulan naman na nagtios an parasakay sa pagbayad nin minimum veinte hanggan cuarenta pesos sa tolong kilometrong buag sa banwa.

Nagpasensiya an gabos ta bawal na magsakay nin sobra sa saro dahil sa pandemya. Nasabotan man ninda an pagtios kan mga drayber kan panahon na ito.

Ngonian na binabaan na an Alert Level, natural na maglaom an publico (dae na kabale si Nestor) na ibaba man an pamasahe.

Kan ibaba kan alcalde an minimum na bayad sa diez, naogma an cadaclan, ta sa wakas madagdagan na an saendang pambakal nin pagcaon.

Dinagdagan man an kapasidad kan traysikel sa tolong bakunadong pasahero, imbes na saro, caya dae man daa malugi an TODA.

Alagad, segun sa mga nacaisi, binawi na daa kan alcalde an executive order y gigibohon na quince an minimum fare matapos na makipagdialogo an mga opisyal kan mga TODA.

Iyo man ini an sector na hinaryaw kan alcalde sa campanya kan 2019, pinangakuan na libre na an pagkua nin prangkisa sa traysikel y tatawan pa nin cinco mil na asistensya harimbawang maospital. An duwang panugang ini, dae man daa nangyari.

Harani na naman an eleksyon, caya pasensiya naman an publico (kasabay an mga macuapo ni Nestor), talagang masakit magdesisyon an mga elegidong opisyal lalo na voto an paghoronan…

*****

Madugo-dugo an panahon na ini para sa mga ninong y ninang, lalo na ta puede nang maglamyerda an mga aqui.

Atang puede nang mag-ako nin parainom y parakaon sa laog nin harong, lalo na bakunado, madakul man an gahagad nin mga pamasko.

Dae na sigurong COVID, ta pano na an mga grocery y mall nin mga namakal, kaibahan an saendang mga saday pang aqui para mamili nin kawatang uuyagon man sana paka sarong aldaw.

An ibang mga politico ngani, nagralarga na pa-Maynilang kayganda para duman magselebrar y makaiwas sa mga para-solicit, kabali na itong mga tawong iguang bitbit na folder nin listahan nin votante.

An sigurado sanang adindi para manaltag nin masque diit na mejoras iyo si Gob Boboy Cua ty pag-iriba.

Dapat magpadara nin pulis sa mga papila kan mga kandidatong ini tanganing mamantenir an physical distancing.

Leave a Reply

This site uses Akismet to reduce spam. Learn how your comment data is processed.

%d bloggers like this: