ISIP-ISIPON TA:

Congressman Laynes?

Harayo pa ang deadline kan pag-file nin kandidatura sa eleksyon sa Mayo 2022, garuluwas na an mga ibutasan sa rueda.

Kung makaagui kamo sa tampad kan kapilya nin INC sa San Isidro Village, aduman nakapaskil an mga tarpolin kan ibang mga makandidato.

An iba man sige nang paheling sa publico (bako sana sa familia ni Nestor) y an iba nakiigtok sa barangay o nakilamay sa gadan.

Ngonian, dae man an nin problema, lalo na kung sinda dae man nin darang Covid. An masakit, kung daeng darang cuarta o panartag man lamang na sigarilyo, inumon, bagas o sardinas sa saedang bibisitahon.

Guiromdomon tabi ninda na kung dae ka magtangway sa inuman, momodahon ka pagtarikod mo, he! he! he!

*****

Iguang bag-ong bareta na nakaabot sa sakuyang taringa.

Saro daang sinako an cuarta an nag-ofrecir na capitalan an pagkandidato ni Samuel Laynes, bako na magbarik sa pagka-alcalde nin Virac, kundi para magin congressman sa 2022.

Dae tabi magpalakpak an campo ni Mayor Posoy, ta an saro daa sa kondisyon iyo na si Gob Boboy an magdalagan bilang alcalde nin Virac, mantang an tugang na si Bos Te masakat sa capitolyo paka-graduar sa Calolbon.

An hapot: pano na si Cong Hector?

Hababa daa pano an nakukua caini sa survey sa panahon ngonian, resulta siguro kan awat niyang patago sa Maynilang kayganda kan panahon nin pandemya.

Sabi ngani kan mga parahingibit nin mga posibilidades sa local na politica, iyo ngaya hababa man siya caidto pagpoon kan campanya sa 2019. Alagad ngonian daa, an saiyang hababang grado sa mga votante, iguang kaibang pagkadisganar.

Caya daa an capitalista naghapot-hapot na sa mga midbid na kristo sa bulangan sa isla tanganing maheling kung sisay pa an capable na maglaog sa Kongreso.

Masakit man daa kung an dati na naman an padalaganon ta isi na an kalibre y kaluyahan. Mayad pa daang bag-ong dugo ta dae pang dukit masyado.

Helingon ta kung anong mangyari sa maabot na duwang bulan.

*****

Diyan daa sa Virac, naningil na si dating alcalde Cito sa saiyang pagsuporta qui Posoy kan 2019, bagay na ikinaderota ni Laynes.

Segun sa mga osipon kan nagviolar nin physical distancing y public gathering sa pabertdey kan dating alcalde, inanuncio na daa caini na an magiging bise mayor ni Posoy iyo si dating alcalde Flerida.

Saro pa, an joven pang aqui ninda na si Jan-jan madalagan man bilang bocal sa West district.

Kung sabagay, dae man ining problema sa fondo an mga Alberto ta malakas an mga ini qui Senador Bong Go y may mga amigong big-time na sugarol na puedeng hagadan.

Pano na man daw si Bise Mayor Arlynn y an mga puedeng makisawsaw sa derby na sinda consejal Reynante y consejal Sonny?

*****

Herac man kan mga miembros nin consejo municipal nin Virac, ta sinda na palan an pinasahan kan problema sa saod.

Segun daa sa bareta, hinagad ni alcalde Posoy sa Sangguniang Bayan, lalo na an comitiva sa market, na ibaba an bayad sa arquila sa mga stall sa hiningayad na saod ta dae kaya kan mga paratienda.

An problema sa bagay na ini, an diferencia nagpoon sa alcalde.

Sabi kan mga nacaisi, duro-dacula pa an sukol kan mga stall na nasa plano kan panahon ni alcalde Samuel, alagad paglaog kan bag-ong administrasyon, sinaradayan ini tanganing makanigo an mga binarabang mga stall sa icaduwang escalon.

Hinarale daa an mga stall sa itaas tanganing palugaran an soboot enterong Escalon para arquilahon kan LCC. An problema, nagkapandemya caya dae na siguro madadagos an plano kan LCC na ocuparon an lugar para gibohon na mall.

Sa presenteng lebel kan rental, dae daang mangahas mag-arquila sa saraday na stall ta lugi man, dae mababawi an bayad sa kasaday na lugar na dae ngani daa puedeng istakan nin panindao bakong arog kan enot.

Harimbawa man na babaan kan consejo an bayad, dae na ini matopo sa pigrecomendar na taripa kan finance committee tanganing mabawi man kan municipio an ginastos sa edificio.

Ciento por ciento, an isyu sa saod magiging sentro kan debate sa tribuna sa maabot na campanya. How long is temporary? Very long…

Leave a Reply

This site uses Akismet to reduce spam. Learn how your comment data is processed.

%d bloggers like this: