Duman palan sa Payo, nagdeclarar na an malaban sa presenteng alcalde na si Etal Robles.
Minsan igua pa siyang tadang sarong torno, desidido na daa si bise mayor Bingbong Cabrera na magsakat sa pagka-mayor laban ki Robles.
An saiyang kaibahan iyo si Consejal Arvin Atencia, na mag-graduar na sa Sangguniang Bayan matapos an siyam na taon.
Segun sa mga taga-Payo, dacula an tsansa ni Bise Bingbong na daogon an incumbent masqui katuhod an bolsa kaini.
Nanggana sana daa ini si Etal por sobre sa suporta ni dating Mayor Obet Fernandez, na iyo ngonian saro sa apat na bocal sa East district.
Ang mas masakit ta nagribodan na nin kandila an duwa pirang bulan sana matapos an 2019 elections, caya iguang posibilidad na suportaran ni PBM Obet an sisay man na kalaban ni alcalde o caya siya na mismo an magcandidato kung sa heling niya puede pa siya sa municipio.
Veinte-cuatro anyos na sa politica si Bingbong magpoon kan siya presidente pa kan SK federation y dai pang daog.
Si Mayor Etal man naging consejal ngona nin sarong termino bago nagpahingalo y nagbalik para maging alcalde.
Dati nang iguang dai pagkasinabotan an bise mayor asin an alcalde, dae ngani daa caini inaprobaran an budget kan consejo sagcod na ipasar ini sa paagi kan veto override.
Magayon na laban ini, sarong dating seaman contra sa tahodan na politicong daeng pierde.
Sabi ngani kan sarong maka-Bingbong, si alcalde Etal daa alisto maglangoy sa dagat asin sa salog, alagad an bise mayor daa tunay na politico, masque sa dugui nakalangoy, he! he! he!
*****
Iguang halakbang na an angog an nagsuhestiyon harimbawang abotan pa nin 2022 an pandemya sa COVID-19.
Tibaad lamang daa bag-ohon nin diit an ginibo kan nacaaguing Miercoles de Ceniza sa mga simbahan.
Maguiromdoman na an estilo ngonian, tanganing makarikay sa nakaolakit na birus, iyo an pagbubod nin abo sa tukboan kan tawo, bako na itong ipakrusan sa angog.
Cotana daa, sa masunod, bako sanang abo an ibubod sa payo, kundi dagdagan lamang nin abono sa buhok, he! he! he!
*****
Herac man ni OIC-Superintendente Collano, dae pa ngani gainit an tocawan sa division office, sinung-ag na sa calayo kan mga bocal.
Kung iisipon, bako man niya man na sala an pag-implementar kan feeding program kan DepEd ta ini pina-bidding kan panahon pa ni Despi, an dae naringwan na amo kan saiyang mga alipores.
Dae niya man pina-bidding an contrata sa pagcaon asin gatas, na an nagkapot iyo an BAC chairman na si ASDS Loi dela Rosa.
Lalong bako niya man na isi na linayog palan an atop kan grandstand y nag-landing sa duwang harong. Mas lalong bako niya man na cargo an cotana pagbisita kan mga taga-dibisyon sa familia kan mga narumpag na harong tanganing makihumapot man lamang y makidumamay.
An mga nacaisip caini cotana si dating SDS Despi y pag-iriba.
Alagad, dae man kitang maginibo kung dahel sa nagkaralabo an mga opisyales kan DepEd kan bagyo, nagkangirimon an mga ini y dae na naisip an nadanyos kan saendang atop.
Segun sa pagkurikag kan isyu ni PBM Tanael, bako man DPWH an nagpacontrata kan atop kan 2012-2013.
Caya posibleng an PEO an nagdisenyo, nagplano y nagpacontrata caini. Ano daw kung dae man nalabo kan mga nacaaguing bagyo an plano caini?
*****
Segun sa mga chismoso, ibawal na daa kan administrasyon ni alcalde Posoy an mga traysikel sa national road.
Igua daang ipaviajeng sampulong mga multicab o jeepney magpoon sa boundary nin Bato sa San Vicente hanggan sa boundary man kan Calolbon duman sa tampad kan farm ni ex-mayor Cito.
Entonces, an mga traysikel man na hari nin Buyo district hanggan na sana sa Bigaa y an mga viajeng papuntang coastal mapundo na sa Palta Small, SIV y Gogon.
Puede siguro ining gibohon kung aldaw pero masakit ipasunod kung banggui na ta garahe na an mga pulis trapik y kulang na man an awto sa highway/ Ano man daw kan mga traysikel driver caini?