efren ETASOR sorra
dating chain-smoker ako
2-3ng caha uru-aldaw
patago-tago kang aki pa
hinayag kang magkatrabaho na
sugkod ko ang pagcigarilyo
iyan ang macusog na paniwala ko
kung dai ako nakapa-aso
maluya ang output sa trabaho
sa pagsurat o pag-maestro
baging seminiya ang kimot ko
sa harong, oficina, maski saen
piga duragan ning naiistorbo
pantalon, polo natuhûan ning calayo
uyabos pa nganing ang harong masulo
kang maduktan su ulunan buda tamong
sarong aldaw, kang sigeng dry-cough ko
sinabihan ako ning doctor na amigo
“kung dai ka magtunong pagcigarilyo
dai na maawat ang buhay mo”
Julio 13, 1993: 27 taon na palan
pakatapos ning ma-40ng halawig na taon
nagtungkâ ako kaitong maraot na bisyo
ngonian buhay pa ako, maogma familia ko
sabi daa mangluluya pag magtunong
kabubuwaan palan, naging mas healthy ngani
ata! nag pogi pa ngani daa (hahaha)