Herac man ni dating Gob Boboy Cua, kinalat sa social media an mga litratong kinua nin pulis habang nakaaresto sa istasyon sa Virac.
Caya bacong kananari na an cadaclan na mga loyalista caini an suspetsa iguang pagcaisi an capitolyo sa nangyari.
Mariwanag daang an illegal na pagluwas kan mga mugshot, na sarong pagbalga sa Data Privacy Act, saro sana an katuyuhan – an idungdong pa sa dugi an reputasyon kan politico.
Nag-investigar na daa an Campo Camacho sa nangyari alagad dae pa sinabi kung sisay an nagpaluwas kan mga litrato. An hapot, magtuga daw an sisay man na halangkaw na opisyal na hinagadan caini, o iguang masacrificio tanganing dae maoringan an pandoc kan mga nacaisi?
*****
Maguiromdoman kan gabos na dae pa sana naawat, nagluwas man an warrant of arrest sa kasong libel laban qui gobernador.
Alagad dae man ini dinakop kan kapulisan kundi inibahan pa ngani daa sa pagbayad nin piyansa duman sa korte, kuntodo bantay asin pamandong nin payong sa mga nagbarantay na taga-media.
Mamundong pag-isip-isipon alagad bakong pantay an tratamiento sa mga midbid na tawo, sa politica man o sa negocio, kumpara sa mga kulang an kapasidad sa buhay.
Pakaluwas sana kan mandamiento de aresto sa e-warrant system kan local na PNP, siguradong panatidan an sisay man na midbid, sikat, poderoso o politico na magbayad nan in fianza tanganing dae maposasan.
Sa kaso siguro kan gobernador, dae man hinagad kan juez duman sa Quezon City na magpadara an pulis nin pruweba na siya nakabado bilang detenido kan pulis.
Sa kaso ni dating Gob. Cua, caipuhan daang magpresentar an pulis nin litrato na pigdetine siya sa istasyon bago pa man akoon an piyansa.
Bago man sigurong parareho an regulasyon kan duwang korte…
*****
Nanggana palan si Kap Punyot bilang director na marepresentar kan distrito nin Virac sa Dificelco board.
Kadiit kan nagvoto segun sa mga nacaisi, tibaad dae pa nag-abot sa quince porciento kan mga miembros-consumidores.
Duwa man sana an nagcandidato – an dating capitan y an retiradong opisyal nin Dificelco.
An mga reclamador sa social media pati na mga negocianteng afectado kan halangkaw na taripa sa corrinte dae nagtapsok. Natakot man sigurong masuspinde ning NEA, he! he! he!
An nanggana sa distrito nin Caramoran y Pandan, solong candidato si Jorge Tabirara alagad cierto man sigurong iguang magiginibo sa junta directive ta an tinapusan caini electrical engineer.
Bahala na man an taga-Virac maghapot sa saiyang mga amo, he! he! he!
*****
Sabi kan mga sehongan diyan sa Caramoran, duwa daang daga o labo na agricultural an soboot inaplay na for reclassification para maging commercial an gamit.
Soboot an sarong daga aduman sa Bulalacao y an saro aduman sa Datag West kung saen sinalakay nin pulis an tindahan nin bote-boteng gasolina kan sarong dating opisyal nin banwaan.
An duwang daga o labo pagsadiri daa nin sarong halangkaw na opisyal nin capitolyo y an saro man na kagsadiri iguang koneksyon sa saro pang halangkaw na opisyal.
An suspetsa kan mga chismoso, an mga dagang ini tutugdokan nin gasolinahan na aprobado nin capitolyo.
Marinas na negocio ini, diit na patong sa presyo nin krudo, gasolina o gas, hayahay sa capitalista, he! he! he!
Ano daw sa ibang banwaan kung igua pang mga kaparehong plano?
Dae mo man mabasol an mga nacatocaw kung magpabutid-butid, manginaon habang igua pang gabon. Silam sana….