ang sainyang pananaramon
puntiro ning karinasan,
gasilyab sa kadurman,
bitoon ning kaogmahan.
mabagsik ang disposisyon
sa pag-otob ning misyon –
itugdok ang fundasyon
kang totoong kayamanan
sa puso ning kaakian.
mahuyo, maogmahon, mahigos,
mapasensya sa pagpabulos
kang burabod ning kadunungan.
atâ, bacô sanang riksi sa pagbasa
o gayon ning komunikasyon,
o misterio ning mga numero,
o fuerza ning siensya…
kundi caibahan sa pagbatlay
tanganing hanapon ang kaogmahan
sa gabos na linalang lalo na sa kapwa,
maski sa pagtungkad ning mga sikretong
binago ning paanahon, tanganing –
mag ginit ang bagong paghiling;
mabikrad ang bagong paghangos
magsurog ang bagong buhay
dahil kang sainyang pag-antabay
lalong minagayon ang kinaban;
minabuswak ang katotoohan;
namurak ang maogmang dignidad
sa pangangataman ning Kagurangnan.