Diyan palan sa EBMC dialysis center, pigaabot na nin maaaga an mga pasyenteng gapalinig ning iridong katoy.
Segun qui PBM Toto Mendoza, ang gaandar na sanang maquina anom imbes na sampulo. Caya an mga gahelang nin Chronic Kidney Disease o CKD gapirila para magpa-dialysis.
Harimbawang alas once nin banggui an iskedyul nin pasyente, makaparibod siya alas dos na.
Herac man kan mga pasyente, herac man kan mga health workers na naka-duty. Dae pa naman puedeng paandaron an maquinang ini kung dae an doctor.
Dae pang bareta kung ano an problema kung ngata dae pa nahingayad an apat na maquina.
Para mientras gahalat an mga constituentes, magayon na patanidan na nin husto an banwaan kan magastos asin masakit na helang na ini.
Minsan iguang tagama an PhilHealth para sa mga pasyente nin CKD, maculog sa ginhawa an duwa sagcod tolong vez na dialysis cada semana.
An maganancia sana sa helang na ini iyo an ospital pati an mga kumpanya nin bolong. Diyan ngani daa sa CDHI, madagdag na nin maquina para maging quince sa katapusan kan taon, para sana maacomodar an mga nagdadacul na pasyente.
Ngonian, an sisay man na gustong macabali sa pila, inaabisohan na ipadagos an pagbotobot nin sigarilyo, patabad na pag-inom nin alak, pagcaon nin carne y minudencia, paghabhab nin keyk, tsokolate, leche flan, kapeng namit azucar asin iba pang pagcaon na paborito nin mga tanga (su hayop, bakong tawo).
Tanganing maisihan kung madari ka nang magin candidato sa dialysis, magpa-checkup sa RHU, hilingon an BP, blood sugar y creatinine.
Pag halangkaw na an gradong naresibe, cierto ka nang makalaog sa dialysis center, he! he! he!
*****
Binasura na palan kan Municipal Trial Court an kaso manongod sa pagbalga kan National Building Code contra qui dating Gob Boboy Cua.
Inabot daa nin tolong taon na nakatambay an kaso ta sala an corte na dinarhan caini por dahel sa sala man na aplikasyon nin reglamento nin Corte Suprema.
Kang makaabot man ini sa MTC, nagcaigua pa nin kontrobersya an pag-aresto sa dating gobernador.
Imbes na maipaluwas kan Campo Camacho o Virac MPS an litrato o mug shot na edited para dae mamidbid an tawo, iguang daeng calag na autoridad na nagpaluwas kan orihinal na litrato sa social media, dahelan para magdara nin kasusupgan sa dating opisyal.
Dacula an posibilidad na an kagibo caini opisyal sa Campo Camacho na may orden sa kung sisay na politicong kalaban nin mga Cua.
Kung sisay an mga ini, hapoton na sana tabi an mga tahodan na comentarista sa media na alisto sa ispekulasyon, he! he! he!
An hapot ngonian, kung ano an naging resulta kan imbestigasyon na soboot ginibo kan manejamiento kam Campo Camacho base sa pinaluwas caining official statement caidto.
Igua daw lamang nin namidbidan na may sala? Magtuga daw an tunay na kagibo o mahanap na sana nin opisyal na hababa an ranggo na matugot padusahan sa bako niya man gibo?
*****
Dati nang gibo nin mga politico sa Isla Maogma, lalo na an mga congresista y gobernador, na maghagad nin pabor sa superintendente sa division office manongod sa appointment nin mga titser.
Luma nang istorya ini. Caidto pa, bako sana nganing surat o rekomendasyon, sarong apod sana puede na.
Caya kung iguang alegasyon hari sa politico na soboot pigapabakal an vacanteng posisyon sa DepEd Catanduanes, saro sana an gustong sabihon caini – dae napagbigyan an gustong mangyari, he! he! he!
Matubod pa kita kung an mangawngaw sarong aplicante na nagbayad alagad dae man nakua an posisyon.
Batid man magbalos an alisto, he! he! he!
*****
An mga marigmat an mata nacareparo na an gagana daa sa mga proyecto nin capitolyo, minsan ngani sa ibang agencia pa an bidding, saro sanang apelyido, he! he! he!
Pasensya an mga gatubod pang iguang competitive bidding sa ngonian na panahon ta harimbawang magbuso man an contratistang tolto, hahanapan ta hahanapan nin butas an papeles para ma-disqualify.
Ang saya-saya…..