Mga duwang bulan na daa an nacaagui, igua nang nagherelang na mga orig diyan sa barangay Hicming sa Virac.
An iba daa nagadan caya linubong na sana alagad an cadaclan daa binuno asin ipinabakal an carne.
Dae man daa nacaisi an Municipal Agriculture Office ta dae man nin nag-report sa barangay, lalo na si capitan o an consejo.
An suspetsa ngani, bako man hari sa Camarines Sur an ASF virus na nakaolakit sa mga hayop na ini kundi sa paagui nin carneng binakal sa saod o caya atamanon na litson na binakal sa lima pang municipio na sagcod sa ngonian afectado nin ASF: Bato, Baras, Gigmoto, Panganiban asin Viga na nasa “red zone” o lugar na consideradong afectado pa kan helang.
Posible man na tinabangan ini sa paglakop kan mga parapakipista o mga parabuno nin orig na nacaabot sa Hicming kan ini magselebrar kan kapiyestahan kan Hunyo 12 hanggan 13.
Caya an mga ginatos na empleyado nin gobyerno na maatender sa enot na aldaw kan selebrasyon nin ika-ciento veinte seis na anibersaryo kan Servisyo Sibil sa Pandan, inaapodan na dae magkaon nin humba, lechon, pork chop, crispy pata o anupaman na rinuto gamit an carneng orig.
Tolo sa apat na barangay kan población sa kahadean nin alcalde Olog an may positibong resulta nin ASF sa mga orig na ataman.
Kung harimbawan man dae nang ibang caonon ta masakit an sila por sobre sa habagat, sigurohon na diyan niyo na tabi kaduhaya an kinaon niyong orig tanganing dae macaabot sa ibang banwa an helang.
*****
Igua palan daang mga caonan o restaurant, lalo na an mga lutuan sa gilid nin tinampo, na gahalo nin imported na carneng orig hari sa Tsina sa mga binakalan na carne hari sa saod.
Ginigibo daa ini ta mas barato an frozen na carneng imported, dos cientos diez sana an kilo kumpara sat tres cientos cada kilo nin bag-ong buno na carne.
An problema, iba man daa an namit kan carneng tibaad bulan na an inabot sa freezer.
Saro pa, dae sigurado kung an mga carneng ini hari sa Tsina aprubado kan saendang gobyerno para darhon sa Pilipinas o caya nag-agui nin eksaminasyon kan National Meat Inspection Commission (NMIC).
Tanganing librido sa helang, mayad sigurong an saimong orderon bako nang putaheng iguang carneng orig kundi carneng karbaw – paksiw, caldereta, tapa, bulalo.
*****
Dae pa ngani daa natapos an durolak sa Corte manongod sa eleksyon sa pagka-alcalde nin Bato, igua na palan nin nagpresentar na macandidato sa 2028.
Ini daa si retiradong Commodore Glenda T. Pereyra tapos nin abogasya kan maglaog sa Judge Advocate General’s Office kan AFP bago naglipat sa PCG apat na taon an nakarihis.
Manlaenlaen na posisyon an kinaputan caini bago siya na-promote bilang commodore y deputy commander kan PCG Coast Guard Education, Training and Doctrine Command.
Pakaretiro daa caini kan Hunyo, nagvisita daa ini sa Bato asin nanaltag nin repridyeretor sa lambang consejo nin veinte-sieteng barangay.
Harimbawang sabihon ta nang veinte mil an presyo nin pridyeder, cabong-cabong na labing cabangang milyon an ginastos ni commodore sa panartag, he! he! he!
Helingon ta kung inano man ini pag-abot sa campanya sa 2028, lalo na kung siya an pangtolong cabayo sa carera politica, afuera qui alcalde Juan y alcalde Vanessa, he! he! he!
*****
Sige na an ribot ni TGP Cong. Bong Teves.
Dae pa sana naawat pagvisita kan sarong bulan, adyan na naman sa Virac y Caramoran, bitbit an pagcaon pati DSWD food packs.
Caya an mga gatocaw pang capitan na habo pa man paharion jkan saendang nsakupan, samantalahon an baratong pataba, invitaran si TGP Cong masqui anong okasyon….