Nagpoon an semana sa municipio nin Bato, si Johnny Rodulfo pa an gatocaw na alcalde duman.
Segun sa mga nacaisi, dae pa man daang narecibeng orden an alcalde hari sa RTC.
Tibaad pinadara pa sa post office, registered with return card, caya naawat, lalo na siguro kung gabatlay ang cartero.
Minsan daa adyan pa si Juan, nagpagibo na yata ning sadiling tocawan an matucal na alcalde na aqui ni Cong Yoloyo.
Duman na daa ini gatocaw sa Batalay House of Representatives, igua na nganing pinaapod na apat na amo nin departamento sa municipio para hapoton kan alcaldeng prinsesa kung ano an mga programa y proyecto kan presenteng administrasyon.
Dae man daa sinabi kung aanohon an impormasyon hari sa mga department head.
Alagad sabi kan sarong contratista, sa mga arog caan na documento, an importante an numero, he! he! he!
Ta kung iguang numero an mga proyecto, madari na daang cuentahon an porciento, he! he! he!
Bako sana daa sa pagcuenta eksperto an mga congresista nin Batalay, kundi sa pagsingil pa, he! he! he!
*****
Diyan man daa sa DPWH, na an tunay na amo adyan gaopisina sa Batalay House of Representatives, gahonotan an icaduwang congresista qui TGP Cong Bong sa mga proyecto.
Kan nacaaguing semana, inapodan daa an contratistang nanggana sa bidding para sabihon na an proyecto bako man sa congresistang taga-Baras kundi sa representante nin Batalay.
Caya problemado an mapatrabaho kung anong gigibohon sa bagay na ini. Dae man puedeng bangaon an deligencias posibles, he! he! he!
Simple man sana cotana an solusyon: sabi ngani nin mga pilosopo, itao qui Yoloyo an para qui Yoloyo, itao qui Lagabong an para qui Lagabong, itao qui Pata an para qui Pata, he! he! he!
Sa mga lugar nin Pilipinas na an cuarta an labanan sa eleksyon, natural nang an mga ganador na congresista, gobernador o alcalde an maboot kung kisay makapunta an contrata y kung ano man an paomok na dapat itao kan contratista.
Sa provincia y municipio, clarado ini ta kung sisay an may kapot kan fondo, iyo man an manginabang kan deligencia.
Sa DPWH, tolong claseng proyecto an minalaog: an cadaclan na proyecto kan distrito na natural sa congresista kan Distrito mapunta; an pinafondohan kan mga partylist na congresista; y an mga pinafondohan man kan mga senador.
An palaog kan mga taga-luwas cotana iguang parking fee na tres porciento na itatao sa congresistang tunay.
Alagad kung gusto kan congresista na magdacul pa an proyectong pakinabangan nin constituentes, cotana dae nang parking fee.
An camomondo ta bihira an arog caining politico, ta an cadaclan masiba sa cuarta, gapayaman minsan sorobra na, y magtener sa puesto, pwe!
*****
Na-record daa palan an hurit nin sarong sorogoon nin Batalay House of Representatives diyan sa DPWH Catanduanes District Engineering District.
Saro daa panong contratistang taga-luwas an ginamit nin politico para makibali sa bidding nin daculang proyecto sa Isla Maogma.
Kan ini daa magpresentar na sa DPWH BAC, pinuntahan daa ini kan section chief asin hinapot kung ngata sige pang bali sa bidding kung pirmi man sanang piga-disqualify.
Sinabi pa daa kan alalay nin tunay na district engineer na dapat daang masabotan kan contratista na an gabos na proyecto sa DPWH Catanduanes para sana qui Cong Yoloyo, he! he! he!
Kung totoo an nangyaring paglamlam kan among ini y naka-record sa selpon, ciertong makaabot ini duman sa qui Sec. Dizon.
Noarin daw ini aksyonan?