Masakit para sa mga electric cooperative, cabali na an Dificelco, kung haharion na sa singil ning corriente ang systems loss charge.
Guiromdomon tabi na ang systems loss iyo an corriente na nawara sa mga linya magpoon sa mga generator o hydro power plants hanggan sa makaabot sa mga harong kan consumidor.
Iyo man ini an paagui tanganing mabawi kan cooperativa ang mga nawarang corriente dahil sa mga gagamit ning jumper, nahabon na metro pati linya y mga uyag na metro.
Ini pareho man sa camogtacan kan mga water district, na igua man nin inaapod na non-revenue water. Ini an tubig na dae nasisingil dahil sa mga tohong tubo, leak sa linya o intake tank.
Hilnga niyo daw sa statement of account kung iguang singil ang water district manongod sa nawarang tubig.
Sabi ngani caidto ni dating GM Caloy Gianan, ang isyu sa systems loss pareho man sana sa pagbakal nin sila sa saod.
Kung ika daa nagbakal nin sarong bilog na bangus na an timbang sarong kilo, itao ini saimo bako nang sarong kilo.
Natural, haharion kan paratienda an kiskis, hasang asin tulak. Iyo ini an systems loss sa pagbakal ning sila.
Pareho man sa pagbakal nin buko juice, an bayad sa laog kan tipong o botong cabali na an basurang isabod.
Kung an binakal mo servicio sa Calle Mabole, dae maaplay an systems loss ta an hinuba, isulot man sana, he! he! he! Baad ngani igua ka pang madarang helang, he! he! he!
Caya, an mas magayon na gibohon kan Malacanang, bawasan an buwis sa corriente y dagdagan an subsidy tanganing lalo pang magbaba an bayad caini.
Sa ibang nasyon sa Southeast Asia, dacula an subsidy sa corrienteng para sa tawo caya mas hababa an bayadan sa consumo.
*****
Iguang reparo an parasakay sa lantsa manongod sa sea ambulance na soboot pigabakal kan Capitolyo.
An saiyang guilomdom, igua pa daa diyan nin sea ambulance na binakal kan dating administrasyon na sagcod ngonian dae pa ngani nagamit sa paghatod nin pasyente sa ibong.
Ngata daa ta mabakal pa nin saro? Habo gamiton an binakalan kan dating gobernador?
Ini daa hapot man sana, bilang parabayad nin buwis na macontribuir sa pagbakal kan sea ambulance na bago.
Saro pa daa, dae man magagamit an ambulancia sa dagat sa panahon nin mga “ber” na bulan ta macusog an dagat.
Tibaad daa maotsan na sana an pasyente sa kasusuka y ribong nin payo.
Mayad sana daa kung enterong aldaw nin taon calmado an dagat.
Pareho man sana daa in isa pagtabang sa mga nangangaipo nin sakayan nin pasyente pa-Manila o pabarik sa Isla Maogma, gadan man o buhay.
Segun sa mga nacaisi, kung an matao daa nin asistensyang ambulancia o rescue vehicle an capitolyo, atang quince mil na an bayad, an vehiculo puede sanang isakay sa pier nin Virac ta bawal sa Calolbon minsan mas hababa an viaje duman lalo na kung su mapaspas na Calixta an nasakyan.
Ngata daw ini, sabi kan gahumapot?
*****
Sarong ciudadano an nagpadara nin litrato nin sarong temporary PBM na nangaturog sa tocawan sa katahawan nin miting.
Dacul an gustong sabihon kan eksenang ini.
Enot, posibleng nagdamrag an PBM sa kahuhudaw asin kasasabot kan mga papeles hari sa oficina caya kulang an katurog.
Icaduwa, maluya an gapamiting o caya dae nasabotan an pariwanag.
Icatolo, talagang mangaturog si Pay por sobre ta maripot an aircon, mayad pang pahingaroan ngona, he! he! he!
Simple man sana cotana kung pano makalusot kung ika mangaturog sa miting.
Itukod an duwang camot sa lamesa, ikahang an payo sa nakatindog na mga parad, sarado man o bako, asin magsagin-sagin na gapamibi. Hari sana paghuragok tanganing dae ka marisa, he! he! he!