Nagtukaw na palan an bag-ong alcalde nin Bato, matapos na dae makakua nin TRO an campo ni dating Mayor Juan Rodulfo sa COMELEC.
Cadaclan kan mga netizen natural tinawan nin magcacanigong ondra an aqui ni Cong Yoloyo sa kapangganahan caini sa election protest sa solamenteng voto.
Alagad iguang mga tawong naescandalo kan bado ni alcalde Vanessa kan ini magsumpa y mag-asumir kan puesto.
Dae lamang daa binagay an bado sa seryosong okasyon, he! he! he!
Naheling pano an daraculang pakwan, minsan sobrang cabanga na ngani an natahoban, he! he! he!
Ayaw-ayaw man kan mga criticong ini, bahala man an daraga magsul-ot nin gubing na gusto niya.
Dae man ninda isi kung kinulang ang imported na telang pinatahi sa sastre, he! he! he!
O caya tuyo man an pacatahi, lalo na ta isi kan mga fashionista an bado dapat ipahiling an saimong pinakamagayon na mga assets.
Saro pa, dae man nahiling sa pagbado-bado kung an sarong elegido, sa voto man o sa corte, alistong magmanejo nin gobyerno local.
*****
Kung dae pa mag-amihan an hangin ngonian na cabang-an nin Septiembre, pangtolong bulan nang nasa drought condition ang Isla Maogma, caibahan an Albay y Camarines Norte.
Sa Virac, an mga barangay na harayo sa Cauayan arog nin SIV, Gogon, Bigaa y iba pang dati nang tios nasa puro nin linya nin tubig, sobrang limang aldaw nang dae nacaheling nin tubig sa saendang mga gripo.
An iba man, arog sa duwang Palnab, caipuhan na magmata nin Matanga para sana magpailig nin tubig sa balde, drum asin planggana para iguang icarigos o ipanghugas pagca-aga.
Duman ngani daa sa Calolbon, gabaratak na an mga uma. An mga deep well o bombahan daa gadurugang na man o kung igua pang nahigop, madugi na an tubig na nakua.
Sa ngonian, dae pa man garasyon nin tubig an water district o caya an local na gobyerno, ta kulang pa siguro an reclamador sa Facebook.
Padagos pa man siguro an mga manedyer sa pagbayad nin mga parapoon para magpamibi na magpadaraha an Kagurangnan nin barongbarong sa Isla Maogma.
Alagad, magayon na magpreparar na an mga alcalde y manedyer nin water district para sa pagrasyon nin tubig sa mga nangangaipo.
*****
Bagui man sana daang piyesta an nangyari kan an Pandan iyo an naging host kan primerong aldaw kan selebrasyon nin ika-126 na taon nin serbisyo sibil.
Habo daa cotana an cadaclan na mga opisyal kan LGU na magpreparar nin handa, ta dae man daa sinda pigapakaon sa Virac kan duman ginibo an parada y programa.
Alagad nagdesisyon daa si alcalde Olog na an mga consejal y mga ibang amo sa municipio magpreparar nin caonon para sa mga visita.
Minsan dae man naacomodar an gabos, cadaclan daa kan mga visita naogma sa marinas na pag-estimar kan municipio.
Onceng litson daa an linuwag para sa boodle fight alagad tol-ang na sana an natada pakatapos kan hurumukan.
Bahala na guiromdomon kan mga naghabhab nin litson na an saendang pig-sharon dae na pagbahog sa saendang ataman na orig.
Tiningkal palan kan NEA an anom sa pitong director nin Dificelco na sinuspinde matapos paboran an companya ni Manoy Hec sa pagcontrata kan EPSA 2.
An desisyon pigluwas bago pa man matapos an noventa dias na suspensyon kan mga BOD member.
An hapot ngonian: mangyari man daw ini sa mga bocal na sinuspinde nin Ombudsman oras na matapos an anom na bulan?
Halaton ta na sana tutal harani na an Noviembre, panahon nin bagyo….*****