Dai gakaoyon an istorya kan pulis sa mga huringhuding manongod sa soboot big-time pusher na nakatakas habang gapabolong sa EBMC kan Simba.
Segun sa bareta kan Virac MPS, dinara daa an detenido sa emergency room matapos na ini magreclamo nin culog nin tulak y pangluya nin ginhawa.
Caibahan daa caini an agom-agom na kasabay niyang nadacop kan Mayo onse sa Bigaa kung sain noventa y unong sachet nin shabu an nakua kan mga operatiba.
Ngonian daa, pag-abot sa ER, aduman sana daa an duwang pulis sa luwas mantang si Jerwin Cruz, na dae daa nakaposas, y an saiyang caibahan nasa laog.
Su saro daang bantay, luwas-laog man sa ER para hilngon an pigabantayan.
Sabi daa sa MPS, nagpaaram daa an detenido na maihi asin paglaog sa CR, nag-ipsot sa bintana, naglampaw sa kudal, nag-agui sa maawot na rikod kan EBMC compound.
Inabot nin pitong oras bago daa ini nadakop sa harong kan SK chairman nin San Isidro Village.
Inimbitaran daa sa istasyon si SK chairman pati na saro pang tawo na nagtabang sa pagtago ni Cruz.
Ngonian ka, an hapot kan mga iguang pagcaisi, dae man daa puedeng maka-ipsot sa bintana an suspechado ta dae man daang bintana an CR sa emergency room.
An duman daa exhaust fan na an sukol makalaog sana an tabay nin tawo y an luluwasan oficina nin doctor.
An nangyari daa, habang kahuron kan agom-agom an nurse para sa instruksyon, nagluwas an detenido sa gilid na pinto papunta sa mayor na lobby.
Tinagbo daa ini nin duwang tawo saka sarabay daa sindang nagluwas, naglakaw papunta sa rikod kan ospital y naglampaw sa kudal.
Kung ngata aduman ini nakuang gapatago sa harong kan SK chairman, iyan an dapat discubrehon kan mga imbestigador.
Dapat man maisihan kung sisay an duwang tawong nagtagbo na nag-iba saiya pagluwas sa ospital.
Kung ini talagang tinagbo pagluwas sa ER, an gustong sabihon planado an gabos na nangyari. Mayad nganing nasusod pa….
*****
Isumitir daa otro sa icatolong vez an reclamong quo warranto laban sa anom na temporary PBM na soboot miembros nin Lakas-CMD.
Maguiromdoman na duwang vez nang binasura kan RTC an petisyon dahil sa mga kakulangan, bagay na nagpaisip sa cadaclan kung talagang mga toltol asin veteranong mga abogado an nagpreparar kan mga papeles.
Dae na daa sinda masala, sabi kan campo ni dating alcalde Nonong Mendoza.
Kan nacaaguing semana, nagluwas an bareta na sinayumahan kan Court of Appeals an petisyon kan dating alcalde na baliktadon an desisyon kan Ombudsman.
An hapot kan ibang mga marigmat an mata, ngata daa ta nangarap pa man an dating alcalde na siya manombraran bilang kasalidang bocal kung sa mata nin Ombudsman asin CA, dae na mabago an desisyon caini na siya sipaon sa puwesto y nuncang dae makalaog sa anuman na posisyon sa gobyerno.
An simbag, ta dae pa man siya nasentensiyahan nin pinal kan Korte Suprema.
Siring man siguro an camogtacan ni Razal na gusto pang ipatocaw ni Gob Pata bilang supply officer sa capitolyo minsan igua nang pigaatubang na kaso nin malversation sa Ombudsman.
Sabi ngani kan mga kalaban nin capitolyo, sisay daa an nakaptan sa sogoc-sogoc ta dae nabutsanan an tawong ini minsan dacul pang qualificadong opisyal an puedeng isalida?
*****
Maisihan man ngonian na semana kung sisay an masalida sa pagka-chairman kan SP Committee on Justice matapos ma maotsan si PBM Oyong.
Ini na an panduwang vez na natigbak an chairman kan comitiva sa laog nin sarong bulan.
An dating chairman caini na si PBM Sonny Francisco (tabangan nin Diyos) inatakehon sa puso sarong semana matapos suspendihon kan Ombudsman kaiba an bise gobernador y siyam pang bocal dahil sa reclamo ni gobernador.
Sisay daw kila vice chairman Joy Tamayo y mga miembrong sinda Virginia Sanchez, Aida Dianela y Joseph Mendoza an mavoluntad na magsalida sa namaaram na bocal?
Magayon caini ipaagui na sana sa raffle, he! he! he!