Otsenta y uno na an Isla Maogma bilang independienteng provincia.
Iguang mga actividad na puedeng puntahan diyan sa capitolyo.
Naenot na kan Lunes an wreath-laying nin burac diyan sa monument qui Cong. Francisco Alcantara Perfecto, na iyo an nag proponir kan ley na nagseparar sa Catanduanes sa Albay.
Aqui nin taga-Masbateng ama y taga-Catanduanes na ina, siya dinara sa isla kan panahon y uya na nagdacula hanggan maguing abogado y politico.
Utang kan enterong Catandunganon saiya an pagiging tunay na provincia kan isla.
Mabuhay ka, Cong. Perfecto!
*****
Igua palan nin diit na drama sa pagpoon kan selebrasyon kan anibersaryo kan Catanduanes.
Pacatapos daa tagboon an huesped de onor, an presidente kan League of Provinces na si Gob Reynaldo Tamayo Jr. kan South Cotabato, dagos nang pinangenotan ni Gob Azanza an pagbukas kan tolong aldaw na selebrasyon sa atubangan kan capitolyo.
An problema daa ta nag-abot an inimbitaran na si Cong Yoloyo, na pirang bulan nang nakidulak sa gobernadora sa paagui nin mga trolls sa social media.
Segun sa mga nacaheling, baguing maribong daa an arimantac ni gob, ta pati an ibang opisyal sa programa, dae na nareparo kan siya magpataratara.
Pacatapos daa kan programa sa ribbon-cutting kan Ginikanan exhibit, dagos na daa nagsakat sa saiyang oficina kaiba si Gob Tamayo, he! he! he!
Caya si Cong Yoloyo na an nagbukas kan trade fair, caibahan si Acting Bise Gob Fred, Mayor Posoy, Mayor Aly y Mayor Vanessa.
*****
Sisay daw an makapaluwas nin mga documento sa pagpa-bidding nin onceng wing van pati an doseng bus na pinondohan kan govierno provincial?
Magayon na maipaheling sa constituentes an tunay na papeles para mawara an ispekulasyon na iguang milagrong nangyari.
Ini por sobre ta base sa mga naenot na mga paluwas sa Facebook, an maabot 16-wheeler na kapareho kan mga gamit nin parabakal nin gulay sa Maynilang kayganda.
Alagad an nag-abot mas hababa, kung baga nag-ulnok, nabawasan daa nin sampulong rueda, he! he! he!
Sabi man kan mga nakaheling, baguing lumang modelo man an bus na nabakal.
Minsan aircon ngani y bag-o an mga tocawan, lumang estilo na daa an sasakyan na ini.
Mahari sana an mga dudang ini kung iluwas an papeles kan pagpa-bidding kan wing van y bus, lalo na an rehistro kan mga vehiculo kung saen nakakahang kung anong taon ini ginibo.
*****
Madari man sana palan maghanap nin halangkaw na posisyon sa DPWH.
An importante daa maghanap ka nin tawong iguang midbid sa DPWH central office y Malacanang. An icaduwa daa y pinakaimportante, maghanda nin pahanglas sa bolpen kan mapirma, he! he! he!
Ini daa an nangyari diyan sa matocaw na bag-ong assistant DE.
Nagpatabang daa sa dating DE na ngonian director na sa Visayas na nakahang sa puesto sa siring man na paagui.
Kung ano man an ginamit na pahanglaw, asayte man o baby oil, dae nang sinabi an sehongan sa SIV.
Ni dae ngani daa nacaisi an gatocaw na assistant DE pati an regional director sa Legazpi na igua na palan nin bag-ong kinahang sa puesto.
Iba na an halangkaw, an ambisyon….
*****
Preparado na palan daa an campo ni Gob Azanza sa laban caini qui Cong Yoloyo sa 2028. Dae na daang atrasan.
An gustong sabihon igua nang nakahandang panartag y pangremate sa campanya y oras de peligro, he! he! he!
Paldo siguro kapareho ni Bato Alisto, sabi ngani sa simbahan, siksik, liglig at umaapaw, he! he! he!