Namakal na an Capitolyo nin abaka magpoon kan Viernes.
An bandala hari pa duman sa Sabangan, Caramoran y an halos ciento veinte kilos nagcantidad man nin trese mil pesos.
Segun sa osipon, hanggan katapusan nin bulan mabakal an Capitolyo.
Kung pila man gabos an makua caini, maisihan ta na sana.
Sa nueve milyones pesos na tagama para pambakal nin abaca, masobra sanang otsenta y unong tonelada an kaya caining bakalon.
Harimbawa sanang an produksyon nin bandala sa 2026 pareho sana kan siete mil may cabangang tonelada, mangangahulugan na an mababakal sana kan Capitolyo lampas sanang un porciento kan produksyon kung dae mapapataribong an cuarta.
An cadaclan man siyempre kan hinag-ot kung bakong ipabakal sa mga saraday na abaca trader sa manlaen-laen na banwaan, o caya sa Virac duman sa Ching Bee o ki Cua, o ibyahe sa ibong.
*****
An posibleng mangyayari sa nabakal nang bandala, itago ini sa bodega o itao na duman sa mga kooperatiba na soboot maguibo in manlaenlaen na finished products arog kan tsinelas, bado o mga wall decoration.
Kung mahaman an mga ini sa lalong madaring panahon, puede nang ipabakal sa mga local na negociante o caya idara sa Maynilang kayganda para ipabakal.
An problema sana, kung mariksi an pagbakal nin bandala, dapat mariksi man an paggibo caini sa finished product.
Kung an mga ini dae naipabakal ta kulang an interes dindi, tibaad maafectaran an pagpapataribong kan fondo.
Harimbawang magbagyo naman nin macusog, baad lalong marunot an mga natada pang mga tanom.
Saen pa makua nin babakalon na abaka?
Cotana daa, sabi man nin sarong pakialamero, ibogtak na sana an fondo sa programa nin PhilFIDA sa abaca disease asin rehabilitasyon kan mga abacanhan na naafectaran nin bunchy top o abaca mosaic na helang.
*****
An cada miembro nin Sangguniang Panlalawigan pigabayadan nin mga ciudadano nin cien mil cada bulan.
Dae pa cabali dindi an anuman na allowance o bonus, pati na an soboot mga brown envelope donasyon nin kung sisay, he! he! he!
Natural, dae man cabali an ganancia o deligencia sa mga contrata sa proyecto man o supply nin gamit sa Capitolyo, na segun sa mga chismoso alisto an magcapirang bocal ta harani sa dapog.
Ngonian, an cotana catucal kan bayad asin deligenciang ini, toltol man na trabaho bilang representante kan saendang distrito.
Saro sa mga responsibilidad na ini iyo an pagpasar sa mga resolusyon o ordinansa na caipuhan mag-agui sa tamang proceso.
Sa nangyari sa sesyon kan Lunes, bacong toltol na basta na sana ipasar an limang resolusyon, pati na an pag-oyon sa appointment kan tolong halangkaw na opisyal, na dae napagdiscutir sa sesyon.
Ini caipuhan lalo na ta an saro sa tolong opisyal na ini pitong vez nang sinayumahan kan dating SP na pinangenotan ni Bise Gob Obet.
Sayang an bayad nin banwaan sa mga bocal na ini kung simpleng committee report dae naisumitir sa sesyon.
An gustong sabihon caini, dae ninda kayang pirmahan an committee report sa kung anong rason.
Sala an kaisipan na an mayoriya kan mga resolusyon o ordinansa dae sana aaksyonan kan comitiva para maging deemed approved oras na matapos an panahon na ini aksyunan kan SP.
Pan-o na kung an nakasalang na isyu importanteng maisihan kan media na nakabantay sa sesyon?
Pan-o na kung an resolusyon or ordinansa posibleng kuwestiyonon sa korte o Ombudsman?
Kung arog caini an kaisipan ngonian sa SP, mas mayad pa an grupo ni Obet.