naggibo ako ning huru-hardin
na pinaributan ning tarutog;
kaya, nagkaipo ning grabeng batong
mangiba-iba ang pagkadacula
bilogon, haraban-on,taripyad
mahib-og, gurung-gutongon…
batong buhay, daripay
sagcod mga tarangtang.
ang paghimo caining obra
dai inapura, pirming maogma
sa pagpatama-tama kang elemento
sagcod mahaman ang kagayonan.
su sobrang mga antol, tinipon
para sa maabot na panahon;
seguro sa saro pang tarutog,
para sa tinampo, o harong.
ta ang lambang bato
igwa segurong destino.
———-
*TARUTOG(rip-rap) pinaratong-patong
na bato na ga sirveng sangki ning
daga; kudal na mga bato