Sarong consumidor an nag-Marites na caya daa naawat dindi an mga taga-ibong na parahingayad nin linya nin PLDT internet o WiFi ta igua daang raket an mga ini.
Maguiromdoman na poon pa kan paka-bagyong Pepito, nag-arabot sa Isla Maogma an mga parahingayad na ini sakay kan saendang mga vehiculo para tabangan an local na contractor nin PLDT na maayos an internet kan mga tawong dae mabuhay na daeng Facebook, Messenger, Netflix, Youtube asin iba pang dae man nakabasog.
Kang natapos nang makabit an mga turumba asin nagkapurutol na linya, aw hanom ta padagos pa daang nawara-wara an signal minsan dae man nin bagyo.
Ini daa an sikreto sabi kan agrabyadong consumidor.
Tangani daang sige sana sindang trabaho (natural aldawan o pakyawan an saendang bayad), pigahugkot daa kan mga dipungalan an linya kan kun sisay na consumidor. Natural mareklamo sa PLDT hotline, makua nin tiket y an tiket na ini iapod sa mga contratistang bisita. Kaching!!!! Igua na naman nin kita.
Inda kun padagos pa ini ta dae na man naheheling sa tinampo an mga parahingayad na ini.
*****
An mga parapautang na companya igua man daang raket, sabi pa kan goslab na reclamador.
Segun daa sa mga dating empleyado kan mga lending firm na gakaralat na sa gilid-gilid kan Virac, an mg aini gasingil sa cada parautang nin tres cientos pesos na bayad bilang notarial fee.
Alagad, an contrata sa utang dae man daa pigapanotaryohan sa abogado kung dae man sindang naheling na problema sa pagbayad kan taga-London.
Idara sana daa an documento sa abogado kung dae na gabayad an nag-utang.
Kung icuenta mo an ganancia, dacula man an paipit kan mga ini. Harimbawa, sanggatos an nag-utang y sampulo sana an dae nakabayad, an gustong sabihon nobenta an contrata na daeng notaryo.
An ganancia kan lending firm, veinte siete mil pesos, daculang barangabangaon o, kung tahodan an manedyer, pirang bangging pamakal nin hilaw na carne sa Calle Mabole, he! he! he!
Caya inaapudan an mga taga-London na sigurohon daang iguang notaryo an kapot nindang kopya kan contrata sa utang.
Magayon siguro pakialaman an mga lending firm na ini kan Bigay Ikaw Regalo, lalo na ta an cada notaryadong documento ngonian nangaipo na nin documentary stamp na duman sana mababakal sa San Isidro Village sa kahadean nin RDO.
Dae na daa ini pinapabakal sa mga tesoreria o caya sa tindahan ta golpi daa an patong sa barato man sanang stamp. Habo nin BIR nin kakumpetensiya, he! he! he!
*****
An nasyon na Korea asin Japan an igua sa pinakahalangkaw na suicide rate sa kinaban, sabi daa.
Kan nacaaguing semana, sarong artistang babayi sa South Korea an nakuang gadan sa sadiring harong y dae man daang foul play, sabi kan mga pulis.
Uya sa Isla Maogma, baging gahabol man na maging numero uno sa Bicol kung suicide ang paghoronan.
Sabi kan PSA, kan nacaaguing taon, disisais katawo an nagrigot sa sadili, cadaclan caini sa Virac.
Ngonian sanang bulan, duwang lalaki an nagpurbang rigoton an sadili dahil sa problema sa agom, mayad ngani ta sa sobrang gabat, naputol an lubid kan saro.
An naenot sa purgatoryo sarong pintor sa Calolbon na binayaan daa kan saiyang agom kaiba an kaakian sa dae naisihan na dahelan.
An nakasalbar na gatrabaho sa Maynilang kauganda nagtubod daa sa Marites na an saiyang agom na babaying binayaan sa Virac iguang kaburobakdol.
Sukat nang kulang ang pagtubod sa Diyos caya mga maluya na an boot pag-abot kang mga problema…