Igua daang bag-ong modus operandi ang mga mahabon diyan sa San Isidro Village kung sain halos cincuenta nang mga harong an navictima ngonian na taon.
Segun sa osipon, saro naman na residencia an rinaog nin lupin dae pa sana naawat.
Nanok daa an mga tawo kan biglang magadan an aircon, nagluya an taribong kan electric fan, y nag-ilap-ilap an mga ilaw.
Caya an naaringahotan na residente nagbuhat, sin reparo sa layat kan saendang saday na ayam, buda binuksan an puertahan sa balcon tanganing maglaog an maripot na hangin.
Nanok naman sinda, kumpiyansado ta sarado man an screen door.
An problema, igua man nin darang panggutgot an mahabon, caya nabuksan an screen door, nakalaog sa cuarto kan mag-agom y nakua an laog na cuarta asin selpon sa sarong bag.
Nareparo an panghabon pagkaaga na kan magmata sinda, gisi na an screen door y wara na an laog kan bag.
Pinutol palan daa kan sungayan na mahabas an grounding o unshielded wire kan koneksyon kan Dificelco sa harong kaya nagluya an kuryente.
Dae pa sana daa naawat, saro man na kataning na harong an biglang nawaran nin kuryente nin kamatangaon.
Alagad dae man sinda nagmata para buksan an pinto sa balcon, ta nakakabit sa solar power.
Nareparo na sana kan kagsadiri na dae sinda konektado sa Ficelco kan malobat na an bateriya kan solar.
Namurong na sana daa an inapod na mga taga-Ficelco kung ngata putol an unshielded wire sa metro, na dae man daa hiniwas kan sisay man na residente kan harong.
Caya ngonian na nagpoon na an Misa de Gallo, inaapodan an gabos na ciertohon na sarado o naka-lock an mga bintana o puertahan sa harong bago pa man magluwas nin alas tres nin aga para makasiguro nin tocawan sa simbahan.
Tibaad sa kaapurahan niyong makumpleto an siyam na Misa, makalaog lugod an mga maitom an calag y tabagon an saendang pinagaran.
*****
Sarong semana na sana Pasko na.
Cadaclan kan mga nakatocaw na politico, asin an mga bako man alagad nag-ambisyon maging honorable, tibaad nasa kanya-kanyang lugar sa maabot na saro o duwang semana.
Itong an mga familia y magayon na estaran aduman sa Maynilang kayganda, dae niyo na pagpuntahan, lalo na kung pirmi man sanang sarado an gate kan harong sa Isla Maogma.
Sayang lang an saendang batlay o gasolina kung abutan kamo nin pilang oras nin halat sa trangkahan, ni painumon nin tubig o duhoran nin biskwit dai.
An siguradong pila aduman sa iguang tulay papunta sa harong ni Gob Boboy Cua ta ciertong igua ka lamang bitbiton na supot buda calendaryo.
An mga candidatong kulang an pambubod sabuton niyo na sana ta sa ultimo hora na an masabwag ning pangkurukay. Sabi ngani nin mga gurang, masakit pugaon an bato.
Dapat man maintindihan kan mga nangaroling, lalo na mga tahodan nang mga votante, kung mananggatos sana an iduhor kan mg aini.
Sa karibokan kan maabot na eleksyon, siguradong ringaw na an aquinientos o manangribo sa sobre para sa mga ga-caroling kan Kapaskuhan.
*****
Hayahay an mga empleyado sa gobyerno na macaresibe nin veinte mil na SRI hari qui PBBM.
Ini tabi ito sanang mga LGU o opisina nasyunal na iguang mga available na fondo sa PS allotment o kung kulang, sa MOOE.
Kung an saendang amo o naging amo inubos an na an PS funding o MOOE sa pagpalaog nin mga tawo o pamakal ning bako man kaimportanteng mga gamit para masabing iguang nahaman, pasensya an gabos.
Hapoton ta daw an mga nanunungdan sa CatSU kung igua sinda ngonian ning CAN o caya pambayad sa P20,000 na SRI…