Matapos na ibasura kan Makati City RTC ang kaso ki Atorni Eric Isidoro manongod sa saiyang partisipasyon kuno sa operasyon kan shabu lab sa Palta Small, Virac, dacula ang posibilidad na isabod man kan DOJ ang parehong reclamo laban sa duwang magtugang na Wong, ex-Cong Sarmiento asin iba pang personajes na base sa testimony ani Entoy Tabor.
Maguiromdoman na binalewala kan Corte an mga tataramon kan star witness sa saiyang mga Sinumpaang Salaysay pati na sa pagbista ta bako daang katutubod.
Ngonian, an importanteng hapot, dae daw nin mahabol sa testigong ini sa danyos na tinao niya sa integridad asin pagbuhay-buhay kan mga inakusaran niya nin salang gibo?
Saro pang hapot, sisay daw an nagsugo sa tawong ini na doonan si Atorni Isidro asin iba pang personajes? Posible daw na saro na an dahelan iyo na tagoon an tunay na mga kakumplotan kan mga Intsik sa shabu lab?
Adyan man sana daa si Entoy sa Calolbon ta naelegir na kagawad sa barangay. Puede ining hapoton, kung iguang mahapot.
*****
Baguing madagos na an pagpatugdok kan MICES gymnasium ni Ako Bicol Partylist Rep. Zaldy Co diyan sa lote ning CatSU sa tampad kan St. John Seminary sa Calatagan Tibang.
Sinurvey na kan mga ingeniero nin National Power Corporation an daga kung an edificio maafectaran an 69-kV transmission line na gaagui sa itaas caini.
An gustong sabihon, mapalakpak an Batalay House of Representatives ta sinda an nanggana na horonotan sa proyecto laban sa Capitolyo y an presidente kan CatSU.
An hapot sana sa DPWH regional office y sa duwang congresistang alisto, ano an gigibohon ninda sa Primary Health Care station na cabale sa proyecto na cotana an local na gobyerno an mapadalagan?
Dae man puedeng an CatSU an magkapot caini ta bakong mandato nin unibersidad na serbihan an mga ordinaryong ciudadano, kundi an mga estudyantes.
Dae man puedeng an congressional district office an makapot ta mas lalong dae cabale sa saendang trabaho.
Sukat nang umagaw-agaw nin bako ninda….
*****
Gakaarano na an mga opisyal diyan sa CatSU ta baguing nasasala na sa direksyon?
Sa miting daa kan Board of Regents kan Agosto 2, nagpasar daa ini resolusyon na dae ngona pasumpaon an nangganang presidente kan University Student Council (USC) sa eleksyon limang bulan na an nacaagui.
Segun daa sa BOR, dapat daa ngonang maresolvaran an reclamong bako daang qualificado si Virgilio Cortado Jr. na magcandidato bilang presidente y an bagay na ini tinao sa sarong comitiva na pangengenotan ni Regent Ramil Joselito Tamayo.
An hapot, ngata na masawsaw an BOR sa isyung tinokar na kan COMELEC na iyo an nagpacandidato y nagproclamar qui Cortado? Kung iguang reclamo, cotana caidto pa bago mag eleksyon hanggan quince dias paka proclamar.
Ngata ta dae ninda pagpariwanagon an COMELEC, kung harimbawa man nasala ini sa proseso?
Ngata ta dae ninda pagpatocawon an binotohan nin cuatro mil, sais cientos noventa y sais na estudyante?
Sayang na absent daa si Regent Atty. Santiago Gabionza Jr. sa miting.
Tibaad an aduman mga regional director na dae man nin pakialam sa isyu kan mga estudyante, pati na private sector representative na sige man sanang oho, pati saro pang regent na duwa an utang na boot sa presidente, pati saro pang kahoron pa sana sa politica.
Masakit na kawat ini, ta tibaad marabya an mga afectado, magcaorocag na naman an campus kung magprotesta an mga ini.
Treintang taon na an nacaagui, igua man nin nacanamit kung inano marabya an mga aqui…