Nagvisita na palan an bag-ong District Engineer na si Simon Arias sa capitolyo pati na sa municipio.
Pero an pinakaimportanteng pinuntahan niya ang Batalay House of Representatives, an rason kung ngata naglayas an limang dating mga DE o OIC sa DPWH Catanduanes District Engineering Office.
Segun sa mga osipon, an pagbogtak daa caini diyan sa SIV, para ayuson an mga bagay-bagay sa DPWH ta baguing dae nahaman por sobre sa pakialam kan mga halaba an kamot, he! he! he!
Caya ngani daa nagpalakpak an ibang contratista kan madangog na sinabihan daa ni Arias an primero y icatolong congresista kan Isla Maogma na dae niya puedeng hiloton an mga pa-bidding-bidding kan mga proyecto sa oficina para maasegurar na an para ki Juan, ganahon ni Juan, bako ni Pedro.
Saro pa, pag-abot daa caini, hinarari niya an mga espiyang taga-Batalay ta igua man siyang darang sadiring alalay hari sa Masbate.
Alagad, baguing pinakaon man siyempre nin anting-anting nin parabontit ta igua naman daang pigainitan na empleyado, bako sanang saro kundi tolo. An duwa pa daa sa mga pigakalayohan ngonian bako man na invuelto sa politica kundi kapamilya sana.
Halaton ta kung madagos an revanza kan satong mga congresista sa mga filosofo sa DPWH.
Diyan maheling kung an mga politicong ini talagang nag-aradal nin matikmatik, nakamatid nin leksyon sa substraction y addition o an namatidan sana magcuenta kan diez y ocho porcientong deligencia.
*****
Igua na palan nin programa sa radio si atorni Puting Buhok, an Catanduanes Tonto.
Kung sisay an pigapatamaan caini, an gadangog na sana an bahala, he! he! he!
Inenot daa an Dificelco, dahil sa padagos na brownout magpoon pa kan enot na semana nin Hunyo.
Ta an mayor daang target kan retiradong abogado kan DPWH regional office iyo an mga abusadong empleyado y opisyal nin gobyerno, nalasayan an amo kan Coast Guard sa Isla Maogma ta pirmi daang pigadara sa harong an vehiculo kan oficina.
Sinunod man daa an paggamit kan mga politico sa panaltag na tabang nin gobyerno kan DSWD. Damay an mga daraculang politico na pirming gapalitrato sa pagtaltag nin tabang, he! he! he!
Saro pa an maanomalya daang pag-appoint kan mga aplicantes sa teaching positions sa DepEd Division Office kan nacaaguing superintendente.
Pinangakuan man daa na kakasuhan an presidente nin CatSU oras na iguang makuang diferencia sa mga transaksyon base sa COA audit report. Masqui daa si alcalde Samuel Laynes dae nakaligtas, he! he! he!
Kung sa giyera, daeng adres an mga balang pigaluwas kan masinggan ni atorni, he! he! he! An problema, tibaad maubusan nin bala an badil ni atorni sa sobrang paratak-atak.
Bahala na an paradangog magtimbang kan saenyang komentaryo. Kung malanit na sa taringa, huway-huwayan na sana an tanog, he! he! he!
An programa matener sana kung maghalawig an pisi kan soboot amo kan kagsadiri na saro sa pinatamaan ni atorni, he! he! he!
*****
Igua nang temporaryong solusyon sa mga brownout kan nacaaguing mga semana,
Segun qui PBM Joselito Alberto base sa resulta kan pamiting nin SP Committee on Energy, makahang muna daa an Suweco nin duwang 900 kilowatts na genset katukal kan duwang uyag na maquina.
Alagad an dagdag na load dae daa kaya kan presenteng transformer caua ma pupurbaran su transformer sa Solong kung puede pa. Kung uyag na, duman naman makua sa Marinduque. Caya tibaad mga saro o duwang semana pa an satong Christmas light sa Isla Maogma, he! he! he