Igua na palan nin suspetsado sa black propaganda kontra sa magtugang na Cua na pinakalat sa social media.
Midbid daa kan mga alistong netizens an nagkalat kan istorya base sa pangaran caining ginamit.
Posible daang binayadan ini kan sarong familyang nag-entra man sa politica y an mabenepisyaran iyo an sainda man sanang singaki na gustong maging ama kan provincial.
Igua man nin huringhuding na tibaad gapamati na naman ini sa mga pinangaturogan na maging servidor nin banwaan na siya puede nang arquilahon para sa masunod na eleksyon, lalo na ta baguing eksperto siya sa bagay na ini, he! he! he!
*****
Nagpahanda man palan an Batalay House of Representatives kan kapiyestahan nin barangay dae pa sana naawat.
Su saro daang aldaw, reservado sana sa mga taga-DPWH, an agenciang gatasan nin mga congresista sa enterong Pilipinas.
An gabos daang empleyado, lalo na itong mga pigaagihan nin papeles, caipuhan mag-aparecer y maghungit kan pagcaon. An dae sana daa cabali iyo itong dati nang mga midbid na suwail o dae napagbut-an.
Caya daa, an cadaclan nag-atender na sana, ta tibaad makabali sa listahan nin mga persona non grata kan primero y icatolong congresista nin Isla Maogma, he! he! he!
Kung sabagay, sabi kan sarong maniwang nang empleyado, dapat man na makikaon sa Batalay tanganing makabawi man lamang sa nawarang deligencia sa mga proyecto, he! he! he!
Maguiromdoman na magpoon kan termino nin presenteng congresista, cadaclan kan mga proyecto aduman na pina-bidding sa ibong tanganing mapagana an gusto nindang contratista.
Caya lugi an Isla Maogma, ta an mga nangganang taga-ibong, bitbit man an saendang mga trabahador y an buwis na cotana uya sa BIR nin Virac ibayad, aduman na sa Albay.
Kung igua man nin nakalusot na taga-islang contratista, buso an bid sa contrata caya kulang man an ganancia y deligencia.
Resulta, gutom an mga taga-DPWH ta an nakakua sana iyo an icatolong congresista, ni pang toothpick dai, pwe!
*****
Siring sa malunggay cheese pandesal, asingko sana, mainit pa man siyempre an panahon pakatapos kan diit na uran na dara ni Aghon.
Caya padagos an pamibi diyan sa Virac Water District sa pangengenotan ni manedyer Abuab, na gasingil sa PAGASA kan kakulangan na saro pang bagyo na pinanuga kan nacaaguing bulan, he! he! he!
Segun sa pinakahuring paluwas kan agencia sa panahon, an La Niña maabot poon sa Hulyo caya posibleng magtaga-uran na ngonyan na Hunyo, hanggan na ini sa Deciembre.
Sa masunod daang tolong bulan, cabanga kan bulan iguang uran y an cabanga daing til-is an kalangitan, mayad na ini kaysa dai.
Sampulo hanggan treseng bagyo daa an maabot ngonian na Hunyo hanggan Noviembre: saro o duwa sa Hunyo, duwa o tolo cada bulan magpoon Hulyo hanggan Oktubre y saro o duwa sa Noviembre. An para sa Deciembre, piga hiling pa sa bolang kristal kan PAGASA, he! he! he!
*****
Sisipaon daa palan sa CatSU an estudyanteng nagpost kan soboot interview sa presidente kan unibersidad.
Sabi kan mga chismoso, magtubod kamo o dae, hinanapan daa nin magcacanigong rason y an nakua daa pagdaya sa klase. Kung anong pagdaya o cheating ang nangyari, halaton ta na sana.
Tibaad pun-an naman ini ning kung ano pang mga isyu, lalo na daa itong dae daa cotana makagraduar ta kulang nin sarong subject sa first year, alagad sa tabang kan sarong personalidad, nagibohan nin paanos, he! he! he!