Nagpasabot an capitolyo na an nagbudget kan P6 million para sa mga sports activities sa bilog na taon iyo mismo an Local School Board na an co-chair iyo si SDS Coray dela Rosa.
Caya bahala na daa an LSB maghanap nin dagdag na fondo para sa partisipasyon sa Palarong Bicol.
Ta ngonian na taon, mahiwas na an mga gaambisyon sa politica, tibaad maka-solicit an DepEd para sa pagcaon, lalo na bagas.
Puede man isuhestiyon sa mga alcalde na sumangon an saendang mga agriculture technician na magtaranom na nin gulayon na puedeng kuahan nin baronon para sa pagkaon sa training y Bicol Meet.
Magbakal na nin duwa o tolong ogbon nin orig, bahogon sana nin sagmaw ta mahal an feeds. Siguradong maabot man an Abril, puede na ining bunoon.
Dae na mag-isip na magbakal nin sira, ta sa panahon ngonian sayang an gastos. Atang dae nang maayad-ayad na sira, pagkaminahal pa kan natada.
Icatolo, ini an taon para sa satong mga politico na matipon nin cuartang pantaya sa daculang burolang sa Mayo 2025.
Caya magmaan an mga barangay, an mga parabantay nin ampaw na kongkreto, ta tibaad mapalusutan naman kamo nin mga contratista nin mga politico.
Igua man sana kamong mga selpon, gamiton an mga ini tanganing bidyohan an patrabahong balasubas asin ipadara sa Ombudsman o ipost sa Facebook.
Sa DPWH sana, bilyones an cuartang ibaba sa Isla Maogma para sa mga proyecto y an lampas cabanga caini para sa mga flood control projects.
Maguiromdoman na diyan ngani sa Batalay, Bato, harani sa Batalay House of Representatives, adyan an seawall nin barangay na an palaman kan kongkreto baybay asin dugui.
Tinugotan na nin DPWH an mga contratista na imbes bato an ipalaman sa dike, an dugui puede na, he! he! he!
Sa saro sanang proyecto na nagkakahalaga nin P200 million, puede nang makakua nin fondong pambakal nin voto an sisay man na gusto magin congresista.
Bako man sanang an barangay y mga Bantay Ampaw an mareparo kan proyecto kundi pati an magiging kalaban kan congresista o politico ta kung maabara an bayad sa proyecto, dae man nin kubrahon an politico, he! he! he!
*****
Sagcod ngonian, dae pa natunawan an mga empleyado nin CatSU sa narecibe nindang Service Recognition Incentive (SRI) y Gratuity Pay na tinao ni PBBM kan nacaaguing taon.
Segun sa orden kan Malacanang, an cada na sibilyan asin military na personaje nin gobyerno dapat pagresibe nin veinte mil pesos.
Ini daa kung adyan pa sinda sa servicio civil kan Noviembre 30, 2023 o caya nakapagsirbe nin dae mababa sa apat na bulan.
An mga Contract of Service and Job Order employees naman autorisadong makakua nin dae masobra sa cinco mil pesos cada, depende na siguro sa fondo kan agencia.
An mga taga-capitolyo y taga-municipio daa nacarecibe nin veinte mil para sa mga permanente, contractual asin casual na empleyado mantang an mga COS asin JO nakakua man nin cinco mil pesos base sa orden.
An hapot daa kan mga taga-universidad na saro sa top 100 university sa enterong Pilipines, ngata ta diyes mil sana an itinao kan administrasyon? An iba ngani daa ocho mil pesos sana.
An mga COS asin JOs man, halangkaw na daa an ocho cientos pesos cada tawo.
Inda kung totoo ini ta baguing dae man nin anuncio an manejamiento kung talagang diyes o ocho mil pesos sana an SRI na tinao sa mga empleyado y ocho cientos sana sa mga COS asin JOs.
Baguing bako man daang totoo, segun sa mga parasunod kan Facebook, ta dati nang sinabi kan administrasyon na otsenta milyones pesos an cuarta sa caban kan CatSU, sobra-sobra pa daa ngani ini.
Lalong bako man katutubod an sugot kan magcapirang kritiko na tibaad advance na an hamon depata na pinanaltag sa mga empleyado asin manlaenlaen na tawo sa Isla Maogma. Dae man nin hamon na an presyo diez mil pesos.
An cierto daa na nangyari, grabe an gumod-gumod kan mga pinangutang na an veinte mil asin cinco mil. Namroblema na sinda kung pano babayadan an inutang lalo na ta nagamit na sa kung ano-anong gastos.
Maculog sa payo an nabudol, he! he! he!