Sala palan an pagkasabot ta sa gustong sabihon nin RR.
Ini palan bakong Road Reblocking, kundi Remove and Replace, an terminong gamit kan DPWH kung mamandohan an daendatang contratista na harion, rungkabon asin buhusan otro an maluyang claseng baldosa.
Segun sa mga taga-Capilihan, maabot daa sa treinta y cincong bloke nin concrete pavement an iguang markang “RR” na kinahang kan project engineer nin DPWH regional office.
An problema daa, nagretiro na an ingeniero, na enot na daang nagdulag kung sain kan pigahanap na ini kan contratista.
Sa ngonian, pigatusang na daa kan mga equipaje an mga RR na bloke nin baldosa.
Ngonian, an hapot, nangain an mga pinidasong baldosa na ini?
Sabi daa kan mga chismosong alisto sa Bato, tibaad daa aduman ini pigadeliber sa saro man na proyecto kan contratista sa Batalay.
An osipon kan mga sehongan na ini, an gamit daang baybay sa paghalo nin kongkreto hari mismo sa baybayon kung saen aduman nakapuesto an backhoe.
Imbes na boulder o daraculang bato, an pigakahang daa sa seawall iyo an mga pinidado asin baraak na baldosang tinusang sa mga daendatang concreting project.
Ini kung totoo an chismis sa kahadean ni alcalde Juan.
Kung harimbawang totoo, ano daw an pigagibo kan mga bantay kan DPWH regional y district office o caya kan mga personahes kan ENRO sa capitolyo? Puro kagaturog sa pansitan o natapalan nin magisip na plastic na sanribo an mga mata?
Gaano man daw an consejo asin residentes kan Batalay, pabayaan na sanang matapos an saendang seawall tanganing magaba pag-abot nin suoy o tsunami?
*****
Ngonian na Enero, magpoon pa kan ultimong duwang semana kan Deciembre 2022, gamo-gamo na an mga contractor asin supplier sa pagsingil kan bayad sa saendang mga transaksyon sa provincia y municipio.
Igua daang Hunyo pa naideliber an mga pig-supply na mga materyales, alagad Deciembre na nagibohan nin mga papeles.
Caya kung an sarong negociante, an gamit man sanang capital diit na tinipontipon saka inutangan sa bangko na pigapataribong, horowa na an bolsa pakatapos nin pirang bulan.
Atang mabayad na naman nin amelyar sa daga asin singilon kan municipio sa mayor’s permit, dae pa makasingil sa contrata, pwe!
An masakit daa sa mga oficina nin gobyerno ngonian, puro apurado mag-advance nin gamit sa mga tindahan, alagad aabuton nin siyam-siyam sa pagbayad.
Makaresibe man nin tseke an supplier, tonok na sana an tada sa pagbayad sa inutangan y pahanglas sa mga amo sa gobyerno, pwe!
*****
Dae na daa maawat, mabayadan na an sueldo asin benepisyo ni dating consejal Toy Gianan, an honorableng dae nagparibod sa Isla Maogma kan panahon nin pandemya.
Segun sa mga sehongan sa consejo, nagpasar na daa nin resolusyon an Sangguniang Bayan na bayadan na an dating kagawad nin sobra sa P1.6 million kan saiyang dae nakubrang bulanan na sueldo asin leave credits kan siya aduman sa Maynilang kayganda.
An resolusyon caipuhan pa daang pirmahan kan alcalde y sagcod ngonian dae pang osipon kung ini pigrosnosan na.
An hapot ngonian, ano daw an nakakahang na mga “whereas, whereas” sa resolusyon?
Sinaysay daw lamang duman kung ngata an isyu sa ausenteng consejal nakaabot sa panahon na ini?
Ikinahang daw lamang kung pan-o nangyari na dae naisang-at an reclamo kan consejo sa junta provincial minsan idineclara na nindang AWOL an consejal?
Ngata daw ta dai gaturupo an istorya kan pagkapot kan kaso ni ex-councilor Toy?
Kung pigdeclarar na nindang absent without leave y vacante na an puesto kab consejal, ngata ta paka-eleksyon, iyo pa ini an ginibo nindang OIC-vice mayor?
Halaton ta kung noarin makakubra an dating consejal, mahagad lamang kitang pang-isnak, he! he! he!