Nabigla an mga nagdulag sa Mamangal, duman sa baybayon nin Balite sa Virac, kan maheling na sarado na an saday na beach resort na dati na nindang pigapuntahan.
Nabakal na daa palan ini nin sarong halangkaw na opisyal sa Capitolyo sa halagang dose milyones pesos.
Patanoson daa an lugar y tutugdokan nin hotel para sa mga visitang hare sa ibang lugar pati na mga residentes na mapaikrop ning madarian, he! he! he!
Dae na tabi maghapot kung sisay an nakabakal y kung saen hare an cuartang pinambakal.
Igua na naman sigurong naamot sa pilang decadang trabaho kung saen y pigasamantala man an panahon habang barato pa.
Dae sana uri, dae sana uyam, he! he! he!
*****
Sinalidahan na palan an mga amo sa comitiva nin appropriations asin infrastructure diyan sa Sangguniang Panlalawigan.
Ini daa resultado kan hororon kan mayoriya sa presencia ni Cong Bong Teves, na iyo an nag-invitar qui DILG Secretary Jonvic Remulla para carigoson an magcapirang mga bocal, pati na an bise gobernador, na
daeng gamit na sabon.
Caya an duwang PBM na nabudol kan campanya, hinarian na nin puesto y an nagtukal iyo si PBM Bolotoy sa appropriations asin PBM Alba sa infrastructure.
Babawion na man an resolusyon an nagdeclarar qui Gob Azanza bilang personal non grata pati na an mga probisyones sa quarry ordinance na pig-veto kan gobernadora.
Alagad bako pa man na enterong matoninong an iristoryahan kan satong mga elegidong honorable, lalo na ta dae pa man tapos an karasohan sa mag-ibong na lado.
*****
Maogma na palan an Caramoran ngonian dahil sa mga pakulo kan gustong magcandidatong alcalde sa 2028 para salidahan an magraduar na si Mayor Glenda.
Nag-isponsor daa nin basketball tournament si Tardecilla kan Tubli, caya an kalaban na si titser Joy nagpaliga man, libre pa uniporme, gamit pa ngani daa an logo kan gobyerno provincial.
Inda kong igua man nin gimmick si dating Mayor Vacion na soboot matapsok man sa laban.
Ini ngani daang dating maestra tibaad salidahan man sana pag-abot nin oras kan saiyang agom na abogado.
An mga ambisyoso daa pirmi na pating gaaparecer sa mga baylehan kung piyesta pati sa reunion y kung anong tiripon sa barangay.
Pabor an nangyayaring ini sa mga ciudadano, lalo na ta mainit y grabe an pagtios nin banwaan, igua lamang nin nanartag masqui diit y tatanawon na palabas kung banggui.
*****
Nagbali palan daa sa negotiated bidding kan EPSA 2 nin Dificelco an companya ni dating Cong Hector.
Alagad dae pinaboran kan comitiva dahil sa non-compliance o dae pagsunod sa magcapirang criteria.
An saro sa considerasyon iyo an capacidad kan SC Megaworld na magpadalagan nin power plant.
Base sa saendang istorya man sana, dae pa ining tinogdok o pinadalagan na plantang gasuplay nin corriente.
Sabi ngani nin taga-DPWH, atrasado an mga proyectong ginibo kan grupo ni Hector bilang subcontractor y an duwa ngani na-takeover kan nakalistang contratista ta dae nahahaman.
An sabi kan mga director na pabor sa SC Megaworld, mas barato daa nin P1.60 per kWh an presyo kaini compara sa Vivant.
Alagad an hapot ngani kung capable an companya sa isuplay an Corriente base sa pangangaipo kan Isla Maogma.
Tibaad kung ini an manggana, sige na naman kitang kurahaw nin Hector!!!!!