Dae pang magayon na balita sa kaso kang ginadan na MSWDO nin Viga.
Ni dae lamang daang anunciong diit an jefe kan pulis sa Virac kung ano na an saendang ginigibo sa panggadan nin riding-in-tandem para mabawasan an takot kan banwaan.
Gahapot ngani daa an magcapirang taga-media kung murong o dae sa sadiring isip an presenteng comandante kan cuerpo de policia.
Ano daw kung matucalan ini nin uro-alistong jefe pagtukaw ni alcalde Samuel?
*****
Dae daa nadagos an arraignment kan natadang akusado sa kasong concubinage na invuelto an ginadan na MSWDO.
Dae daang naipresentar na abogado an retiradong accountant kan hanapan ini kan juez sa cotana arraignment kan kaso kan fecha dos nin Hunyo.
Dati nang na-postpone man an enot na arraignment kan Mayo 23, sarong aldaw bago tambangan nin mga manggagadan na nakamotor si Eubra duman sa San Isidro Village.
Ta daeng nakaheling kan aktwal na pagbadil sa saiya, an pag-asa na sana kan mga imbestigador kan PNP y NBI iyo an duwang selpon na dara kan victima duman sa awto.
Kung ano an laog na text kan mga ini, pati na an mga litrato, screenshots y iba pang mga files, posibleng makacontribuir tanganing madakop na an mga nambadil pati na an mastermind kung igua man.
*****
Segun sa mga nag-aradal nin abogasya, an concubinage sarong krimen kung saen an sarong kasal na laraki magibo nin arin sa mga minasunod: lantaran na pakiubay sa babayeng bako niya man na na agom; pagharong kan babaye sa harong mismo kan mag-agom; o pakiiba sa babayeng ini sa sarong harong.
An sisay man daang laraki na ma-convict sa concubinage, makulong nin anom na bulan sagcod apat na taon y duwang bulan.
Entonces, puedeng dae makulong kung nasa probation.
An babaye man dae makulong, kundi papadusahan nin destierro. Babawalan siya na dae magpunta sa lugar sa distansyang veinte cinco sagcod dos cientos cincuenta kilometros na distancia.
Kung ano an kaluwasan kan kasong ini sa mga maabot na aldaw, lalo na ta wara na an sarong akusado, dae ta isi.
*****
Puede pa daang maging gobernador si Boboy Cua sa 2025 y 2028.
Ini an posibleng mangyari matapos na siya manggana kan cotana ikatolong termino niya bilang ama kan provincia.
An problema, para sa saiyang mga kalaban, naputol an saiyang termino magpoon 2019 kan dae ini patukawon kan DILG matapos na suspendihon kan Ombudsman nin sarong taon dahil sa kasong paggamit kan contratistang si Yoloyo kan daga na kinatogdokan kan ginabang sinehan.
Base sa desisyon kan Corte Supreme, interrupted o naputol an three-year term ni Gob Boboy kaya an ginana niyang cotana pantolong term, primero na naman.
Sa ngonian daa, dae pa man gaisip an gobernador na tapuson naman an mga masunod pang duwang termino kung siya madagalan.
Posibleng palugaran na caini an tugang na si Bos Te sa 2025 lalo na kung marinas an magin servicio caini bilang bise gobernador.
Kung ini mangyari, puedeng temporaryong magretiro na ngona sa pulitika an gobernador o caya magdalagan para alcalde nin Virac, lalo na kung si alcalde Samuel labanan si Cong Yoloyo sa 2025.
*****
Haen na daw an satong congressman ta dae na nagpaheling magpoon na maderota kan Mayo nueve?
Segun sa mga osipon, igua daa ining mga hinubon na mga bayadan katakod kan campanya, magpoon sa mga vehiculong inarquila sagcod sa mga polyetos.
Cotana, bago magpahingalo sa pulitika si Cong Hec y mag-amot naman nin pambakal nin voto sa 2025, ayuson na ngona an mga obligasyon sa Isla Maogma.
Atang masakit na siyang hagadan nin personal tabang, lalo pang maroro an saiyang camogtacan kung dae mabayadan an mga utang.
Hilnga an nangyari qui alcalde Olog nin Pandan….