Dae na palan makalibre sa kaso an may-agom na lalaking mahilig sa Nido kung makabados ning ibang babaye.
Segun sa Corte Suprema, an lalaki daang may agom na mapa-convert sa Islam para makasal sa saro pang babaye puede pang kasuhan ning bigamy.
Damay daa dindi an ikaduwang agom, caya kung mapatunayan sa Corte, mahimas sinda nin rehas sa laog nin walong taon.
Applicable sana an ley na ini duman sa kasal nin Muslim sa bakong Muslim na dae kinasal sa irarom kan Islamic law.
Caya mag-ingat an mga mahilig mamasyar sa Calle Mabole, an mga iguang iskolar ng bayad, mga matinuwang sa katabang asin iba pang mga iguang sima an daradara, he! he! he!
Kan mga nacaaguing taon, igua nang mga nakadisgrasya nin bako nindang kaubay an nagpa-convert sa Islam minsan dati nang iguang agom para sana makaligtas sa kaso.
Kumusta na daw an mga ini?
*****
Dae daang mangyayaring aratrasan sa laban sa pagca-congressman.
Ini an sinabi ni atorni Puting Buhok, matapos pangenotan an motorcade hari sa Bato pa-San Andres.
Number one an dating abogado kan DPWH sa padaraculan nin poster mantang kapurit sa mga daeng bayad na survey sa Facebook.
Dae man daa maatras an dating congresista y an mga kalaban na sinda Cong Hector y alcalde Yoloyo.
An halaton ta na sana kung ano an sistema ninda sa ultima hora, lalo na kung maghagad na nin pambubod sa mga siwo an mga kaalyado y ward leader.
Diyan daa sa Virac, ipaagui daa kan dating alcalde nin Bato an bitamina qui alcalde Posoy, na iyo an saiyang kaibahan sa pangampanya.
Segun sa mga tahodan na sentenciador sa politica, delicado daa ini lalo na ta igua nang nangyari kan mga nacaaguing eleksyon na an cuartang itinao kan candidato sa halangkaw na posisyon, mag gobernador o congresista, ginamit kan mga tinawan sa sadili nindang laban.
Gana an mga kaalyadong alcalde, alagad daog an nagcapital, he! he! he!
*****
Iguang ciudadanong gahapot kung ngata dae daang ribok an simbahan sa daendatang dara kan e-sabong sa comunidad.
Minsan ngani an mga lideres sa municipio y provincia, dae man nin reclamo, lalo na ta aprobado ni Pay Digong an e-sabong ni Atong Ang y pag-iribang tinawan nin prangkisa kan PAGCOR.
Siguradong igua daa ning porciento an mga LGU o an mga amo mismo, pati na an armadong autoridad, sa mga local na patayaan kan e-sabong.
Caya minsan igua na kitang nadangog na mga empleyado o ordinaryong tawong naadik na sa e-sabong, naprenda na an sueldo o harong sa kauutang ning pangtalpak, silencio sana an gobyerno.
Guiromdomon niyo na nunca mayaman an mga ordinaryong parataya sa e-sabong kundi an mga capitalista.
Sabi kan mga nacaisi, an taya sa e-sabong na gaagui sa GCash, minaabot sa 1.9 bilyones pesos cada aldaw.
Harimbawa na sana makita an capitalista nin veinte porciento, igua siyang 380 milyones cada aldaw o suma total na once bilyones pesos cada bulan.
Minsan bawasan mo pa nin veinte porcientong panglagaw, igua pa siya nin nueve bilyones pesos na tada.
Sa masunod na eleksyon, magcandidato na si Atong Ang sa pagcapresidente y an mga capitalista sa Senado tanganing biyo-biyo na, pwe!
*****
Sa presenteng camogtacan kan politica sa Isla Maogma, naheling na kung sisay an mga magana.
Sigurado na an magtugang na Cua sa saendang dalagan, sabi kan mga sentenciador sa bulangan.
Minsan medyo caipuhan pang dagdagan an taya sa duwang sultada, dati nang lamang an duwang manok na ini sa bahog, ehersisyo y kalidad kan pakol, he! he! he!
An ikatolong manok an medyo delicado, ta naawat sa hawla, hababa pa an layog.
Caya dacula an posibilidad na si Manoy Hec bibitbiton kan duwang Cua tanganing macaantos sa finish line, he! he! he!
Si Cong man an maalsa kang pambubod, he! he! he!